धनवीर पुन, भरतपुर । राष्ट्रिय जनमोर्चाका अध्यक्ष चित्रबहादुर केसीले पार्टीको नीति सही भएकाले आफ्ना जनप्रतिनिधिले भ्रष्टाचार नगरेको स्पष्ट पार्नुभएको छ ।
आज भरतपुरमा अखिल नेपाल जनजाति सम्मेलनको पाँचौँ राष्ट्रिय महाधिवेशनमा प्रमुख अतिथिको आसनबाट मन्तव्य राख्दै उहाँले यस्तो अभिव्यक्ति दिनुभएको हो ।
उहाँले भन्नुभयो– ‘पार्टीको नीति सही भएकाले नै राष्ट्रिय जनमोर्चाका प्रतिनिधिले भ्रष्टाचार गरेनन् ।’
राजमो २०५१ सालदेखि संसद्मा भएको जानकारी दिँदै उहाँले राष्ट्रिय जनमोर्चाका जनप्रतिधिले घुस खाएको कसैले सुन्नुनपरेको दाबी गर्नुभयो ।
अहिले जेनजी आन्दोलनमा भ्रष्टाचारको मुद्दा उठेको प्रसङ्ग निकाल्दै उहाँले राजमोले भ्रष्टाचारको विरुद्ध लगातार आवाज उठाउँदै आएको बताउनुभयो ।
जेनजी आन्दोलनमा घुसपैठ
अध्यक्ष केसीले भ्रष्टाचार विरुद्ध जेनजीको आन्दोलन चलेको भए पनि त्यसमा साम्राज्यवादी शक्तिको घुसपैठ भएको बताउनुभयो ।
‘राजनीतिक पार्टीको आन्दोलनले अहिलेसम्म सिंहदरबार जलाएन, संसद् भवन जलाएन, सर्वोच्च अदालत जलाएन’ उहाँले भन्नुभयो– ‘अहिले जसरी देशलाई खरानी बनाइयो, त्यसमा अमेरिकी साम्राज्यवादको, भारतीय साम्राज्यवादको र तिनका जासुसी संस्थाको भूमिका छ ।’
उहाँले जेनजी आन्दोलनमा घुसपैठ भएका कारणले अहिले देश खरानीको डल्लो बनेको बताउनुभयो ।
अहिले जेनजी आन्दोलनको नाममा एनजिओ पृष्ठभूमि भएकाहरू मन्त्रिमण्डलमा सामेल भएको उहाँको बुझाइ थियो ।
बारबार एडम्सजस्तो राजाहरूले समेत सिआइडी भनेर निष्काशन गरेको शक्तिको पक्ष लिनेहरू अहिले सरकारमा रहेको उहाँको दाबी थियो ।
अहिलेको तात्कालिक राजनीतिक परिस्थितिमिा साम्राज्यवादी शक्तिको हस्तक्षेप सफल भए नेपाल प्यालेस्टाइन वा युक्रेन बन्न सक्ने उहाँको चेतावनी थियो ।
‘यदि नेपाली जनता बेलैमा सचेत भएनन् भने देश प्यालेस्टाइन वा युक्रेन बन्न सक्दछ’ उहाँले जनताले बेलैमा साम्राज्यवादी चलखेललाई बुझ्नुपर्ने आवश्यकतामा जोड दिनुभयो ।
पछिल्लो समयमा सुशीला कार्की सरकारलाई दलाई लामाको बधाईको प्रसङ्ग जोड्दै उहाँले चीनको विरुद्ध अमेरिकी षड्यन्त्रबारे सही बुझाइ आवश्यक रहेको उहाँको भनाइ थियो ।
राजनीतिक दल निष्ठावान् बनुन्
राजनीतिक दलहरू निष्ठावान् नभएकाले देश अहिले यो अवस्थामा आइपुगेको उहाँको भनाइ थियो ।
‘ठुला राजनीतिक पार्टीका कारणले देशको यो अवस्था भयो’ उहाँले भन्नुभयो– ‘देश बन्न राजनीतिक दलहरू चरित्रवान्, नैतिकवान् हुनुपर्दछ ।’
अध्यक्ष केसीले सत्ता सञ्चालन गरिरहेका ठुला राजनीतिक दलको भ्रष्ट चरित्रकै कारणले देश उभो लाग्न नसकेको बताउनुभयो ।
राजनीतिक दलहरूले चुनावलाई समेत भ्रष्ट बनाएको प्रसङ्ग उहाँले मन्तव्यको क्रममा जोड्नुभयो ।
‘राजनीतिक दलहरू चुनावमा बोरामा पैसा बोकेर जान्छन् । त्यो पैसा भ्रष्ट, ठेकेदार, तष्करबाट उठाइएको हुन्छ’ उहाँले भन्नुभयो– ‘सही राजनीतिक दल चिन्ने सवालमा हामी जनता पनि सच्चिनुपर्दछ । जनताले गलत शक्तिलाई चुनावमा जिताएकै कारण देशले यो दुर्दशा भोग्नुपरेको हो ।’
