धनवीर पुनमगर, भरतपुर ।
अखिल नेपाल नेपाल जनजाति सम्मेलनको पाँचौँ राष्ट्रिय सम्मेलन राष्ट्रिय जनमोर्चाका अध्यक्ष तथा पूर्व उपप्रधानमन्त्री चित्रबहादुर केसीको उद्घाटनसँगै आजदेखि चितवनमा सुरु हुने भएको छ ।
उद्योग वाणिज्य सङ्घ चितवनको सभाहलमा २०८२ असोज २६ गते आइतबार दिउँसो १२:३० बजे महाधिवेशनको उद्घाटन हुने भएको हो ।
उद्घाटनमा स्वदेशका विभिन्न भाइचारा सङ्गठनका प्रतिनिधिको उपस्थिति रहने तथा विदेशस्थित भाइचारा सङ्गठनले शुभकामना सन्देश पठाइसकेको अध्यक्ष निमबहादुर बुढाथोकीले बताउनुभयो ।
उहाँले महाधिवेशनको पूर्वसन्ध्यामा जारी गर्नुभएको प्रेसविज्ञप्तिका अनुसार सो कार्यक्रम पर्सि असोज २८ गतेसम्म चल्नेछ । भोलि असोज २७ गते बन्दसत्र सम्पन्न हुनेछ भने पर्सि महाधिवेशनको समापन कार्यक्रम सम्पन्न हुनेछ ।
‘हाम्रो पाँचौँ राष्ट्रिय महाधिवेशन प्रतिनिधिमूलक हुनेछ’ बुढाथोकीले युगदर्शनसित भन्नुभयो– ‘बागलुङ, प्युठान, अर्घाखाँचीसहित केही जिल्लाका प्रतिनिधि हिजो नै आइसक्नुभएको छ । अरू साथीहरू बाटामा हुनुहुन्छ । उहाँहरू सबै आएसँगै दिउँसो महाधिवेशनको उद्घाटन गरिनेछ ।’
अध्यक्ष बुढाथोकीका अनुसार देशको विषम परिस्थितिमाझ पनि पूर्वनिर्धारित कार्यक्रमअनुसार नै महाधिवेशन सम्पन्न गर्ने निर्णय गरिएको बताउनुभयो ।
संसद् विघटन, संसद् बाहिरबाट मन्त्रिमण्डलको गठनजस्ता संविधानसभाबाट निर्माण गरिएको २०७२ सालको संविधानमाथि आँच आउने विषयमा पनि महाधिवेशनमा छलफल हुने उहाँले जानकारी दिनुभयो ।
