काठमाडौँ । अन्तर्राष्ट्रिय महिला विचारगोष्ठी आगामी मङ्सिर ११–१३ गतेसम्म नेपालमै हुने भएको छ ।
नेपालका लागि अन्तर्राष्ट्रिय कोअर्डिनेटर दुर्गा पौडेलको हस्ताक्षरमा २०८२ असोज २२ गते बुधबार प्रेसवक्तव्य जारी गर्दै सो जानकारी दिइएको हो ।
गत असोज १८ गते नेपाल र बाहिरबाट आएका महिलाहरूको संयुक्त बैठकले विषम परिस्थितिका कारण सो गोष्ठी जर्मनीमा गर्ने ठेगान गरेकोमा आजको बैठकले त्यसभन्दा पहिलेकै निर्णयलाई निरन्तरता दिएको छ ।
वक्तव्यमा काठमाडौँमा आयोजित तीनदिने कार्यक्रमको रूपरेखा, विभिन्न प्राविधिक विषयबारे जानकारी दिइएको छ ।
कोअर्डिनेटर पौडेलले नेपालमा यो गोष्ठी हुनु इज्जतको कुरा भएको बताउँदै त्यसलाई सफल पार्न सबैसित अपिल गर्नुभएको छ ।
यस्तो छ, प्रेसवक्तव्यको पूर्ण पाठ :
“महिलाको अन्तर्राष्ट्रिय विचारगोष्ठी काठमाडौँमा आयोजना गर्नेबारे बारम्बार निर्णयमा परिवर्तन गर्नुपरेकोमा हामी तपाईंहरूसित क्षमाप्रार्थी छौँ । नेपालको राजनीतिक स्थितिमा देखा परेको अनिश्चयताका कारणले नेपालमा अन्तर्राष्ट्रिय महिला गोष्ठी हुन सक्ने वा नसक्नेबारे नेपालका र बाहिरका पनि कैयौँ महिला सङ्गठनको बिचमा धेरैपल्ट गम्भीरतापूर्वक छलफल भयो । अन्तिममा आज बसेको नेपालका विभिन्न महिला सङ्गठनको बैठकले त्यो अन्तर्राष्ट्रिय विचारगोष्ठी नेपालमा नै गर्ने निर्णय गरेको छ । त्यो निर्णय भएकोमा हामीले प्रसन्नता प्रकट गर्न चाहन्छौँ ।
तपाईंहरूलाई पहिले नै जानकारी गराएअनुसार त्यो अन्तर्राष्ट्रिय विचारगोष्ठीको उद्घाटन मङ्सिर ११ गते काठमाडौँमा हुनेछ । उक्त सेमिनार १३ गतेसम्म सम्पन्न गरिनेछ । उक्त विचारगोष्ठीमा संसारका विभिन्न देशबाट पनि महिला प्रतिनिधि काठमाडौँमा आउनेछन् भने नेपालबाट पनि ठुलो सङ्ख्यामा त्यो विचारगोष्ठीमा सामेल हुनको लागि हामीले विभिन्न महिला सङ्गठन र आम नेपाली महिलासित पनि अपिल गर्दछौँ ।
११ गतेको उद्घाटन कार्यक्रममा उपस्थित हुनको लागि हामीले सम्पूर्ण नेपाली महिलालाई आमन्त्रित गर्दछौँ । उद्घाटनको एक दिनको कार्यक्रममा आउने महिलालाई कुनै शुल्क लाग्ने छैन भने विचारगोष्ठीमा भाग लिने महिलाले नेरु २००० (अक्षरेपि दुई हजार) प्रवेश शुल्क दिनुपर्नेछ । विचारगोष्ठीमा सामेल हुने महिलाका लागि बिहानको नास्ता, दिउँसोको खाजा र खानासमेतको व्यवस्था गरिनेछ तर बेलुकाको खाना र सुत्ने व्यवस्था स्वयम्ले बेग्लै गर्नुपर्नेछ । विदेशबाट आउने अतिथि महिलाले पनि बेलुकाको खाना वा सुत्ने होटेल आदिको व्यवस्था स्वयम् गर्नुपर्नेछ ।
पहिले महिलाको द्वितीय अन्तर्राष्ट्रिय सम्मेलन काठमाडौँमा सम्पन्न भएको थियो । अहिले अन्तर्राष्ट्रिय महिला विचारगोष्ठीको आयोजना पनि काठमाडौँमा हुनु हामी नेपाली महिलाका लागि ठुलो प्रसन्नता र गौरवको पनि विषय हो । त्यसकारण त्यसलाई सम्पन्न पार्न उत्साहपूर्वक प्रयत्न गर्नु हामी सबै नेपालीको कर्तव्य हुन जान्छ ।
नेपालमा अहिले हुन थालिरहेको अन्तर्राष्ट्रिय महिला विचारगोष्ठीले खालि नेपाली महिलामा मात्र हैन, सम्पूर्ण नेपालको इज्जतको विषय हो । त्यसले अन्तर्राष्ट्रिय जगत्मा पनि नेपालको इज्जत बढाउनेछ । त्यसैले हामीले त्यसलाई सफल पार्न सहयोग गर्न सम्पूर्ण नेपाली जनता, राजनीतिक दल, सामाजिक सङ्घसंस्था तथा सरकार र प्रशासन समेतसित अनुरोध गर्दछौँ ।
उक्त अन्तर्राष्ट्रिय विचारगोष्ठीलाई सफल पार्न अन्य देशका महिलाले पनि सकेसम्म आर्थिक सङ्कलन गर्ने प्रयत्न गर्नेछन् । विचारगोष्ठीका लागि हल, सञ्चार र अनुवादको व्यवस्था सूचना तथा विदेशी अतिथि तथा विचारगोष्ठीमा सामेल हुने विदेशी वा नेपाली महिला प्रतिनिधिको सत्कार र अन्य आवश्यक व्यवस्थासमेतको लागि ठुलो धनराशि आवश्यक हुनेछ । त्यसका लागि बढीभन्दा बढी आर्थिक सहयोग जुटाउनसमेत सम्पूर्ण नेपाली जनतासित अपिल गर्दछौँ ।”
