काठमाडौँ । प्रधानमन्त्री सुशीला कार्कीको सल्लाहकारमा चीन विरोधी मानिएका अजयभद्र खनालको नियुक्ति भएको छ ।
असोज १९ गते मुख्य सल्लाहकारमा नियुक्त खनाल चीनको विपक्षमा अनुसन्धान गरिरहेको ‘सेन्टर फर सोसल इनोभेसन एन्ड फरेन पलिसी’ का रिसर्च डाइरेक्टर रहेकाले सो आशङ्का गरिएको हो ।
जेनजी आन्दोलनमा अमेरिकी प्रभावबारे बहस भइरहेका बेला यस्तो आशङ्काले बल पाएको बताउन थालिएको छ ।
यो संस्था (सी.एस.आई.एफ) अधिकांश चीन र नेपालबारे अध्ययनमा केन्द्रित छ । अध्ययनको नाममा अफवाह फैलाउनसमेत यो संस्था संलग्न रहेको आरोपसमेत लाग्ने गरेको छ ।
यसले “नेपाली मिडियामा चीनको प्रभाव र फेरिँदो नेपालनीति” नामक विवादित प्रतिवेदन सार्वजनिक गर्दै नेपाली मिडियामार्फत चीनले कसरी अमेरिका विरुद्ध काम गरिरहेको छ भन्ने उल्लेख गरेको थियो । यस्ता प्रतिवेदनमा कसको आर्थिक सहयोगमा अनुसन्धान गरिएको हो भन्ने उल्लेख गरिने प्रचलन भए पनि सो प्रतिवेदनमा सो जानकारी उल्लेख थिएन ।
अनुसन्धानको बहानामा चीनको विपक्षमा तथ्यहीन सामग्री राखिएको भन्दै आलोचना भएपछि संस्थाले आफ्नो बेबसाइटबाट उक्त प्रतिवेदन हटाएको थियो ।
खनाल साझा पार्टीमा समेत जोडिएका थिए तर लामो समय टिकेनन् । पत्रकारिता पृष्ठभूमि रहेका खनाल उकालो डट कमका संस्थापक प्रधानसम्पादक पनि हुन् ।
