शङ्करप्रसाद पोख्रेल, बुटवल ।
राष्ट्रिय जनमोर्चा रुपन्देही जिल्ला समितिको आयोजनामा ‘वर्तमान राजनीतिक सङ्कट र यसको समाधान’ विषयक एकदिने प्रशिक्षण कार्यक्रम सम्पन्न भएको छ ।
राजमो अध्यक्ष चित्रबहादुर केसीको प्रमुख आतिथ्यमा २०८२ असोज १० गते शुक्रबार सो कार्यक्रम सम्पन्न भएको हो ।
कार्यक्रमका प्रमुख अतिथि केसीले मुलुकमा देखिएको राजनीतिक सङ्कटलाई विगतका असमान आर्थिक नीति, दलगत अस्वस्थ प्रतिस्पर्धा र विदेशी हस्तक्षेपको परिणामको रूपमा व्याख्या गर्नुभयो ।
‘आजको सङ्कट कुनै आकस्मिक होइन । यसको जरो असमान नीति, सत्तामोह र बाह्य हस्तक्षेपमा छ । यसको निकास भने संविधानको रक्षा र जनताको अधिकार सुनिश्चित गर्ने नीतिमा मात्र सम्भव छ’ उहाँको भनाइ थियो ।
अध्यक्ष केसीले दलहरूबिच विचारभन्दा स्वार्थ र पदलोलुपताले राजनीतिप्रतिको जनविश्वास घटाएको उल्लेख गर्दै राजनीति जनसेवामा केन्द्रित हुनुपर्नेमा जोड दिनुभयो ।
उहाँले थप्नुभयो– ‘राजनीति पद र सम्पत्ति कमाउने साधन होइन, यो जनताका लागि सेवा हो । अब यसलाई फेरि सही बाटोमा फर्काउनुपर्ने समय आएको छ ।’
कार्यक्रममा विशेष अतिथि राजमो लुम्बिनी प्रदेश समितिका सल्लाहकार सुरेश थापाले सङ्गठनात्मक बल र राजनीतिक चेतना अभिवृद्धि नगरी सङ्कट समाधान असम्भव हुने धारणा राख्नुभयो ।
उहाँले पार्टी कार्यकर्ता र जनताबिचको सम्बन्ध अझै मजबुत बनाउन जरुरी रहेको विचार व्यक्त गर्नुभयो ।
जिल्ला अध्यक्ष टानबहादुर केसीको अध्यक्षतामा अघि बढेको उक्त कार्यक्रमको कार्यक्रमको सञ्चालन लालबहादुर क्षेत्रीले तथा स्वागत हर्कबहादुर टन्डनले गर्नुभएको छ ।
