काठमाडौँ । नेपाल कम्यूनिष्ट पार्टी (मसाल)ले शुशिला कार्कीको नेतृत्वमा बनेको सरकार र संसद विघटन प्रक्रिया असंवैधानिक भएको बताएको छ । यहि २०८२ असौज ५ गते बसेको पीवीको बैठक पछि महामन्त्री मोहनविक्रम सिंहले वक्तव्यमार्फत पार्टीको सो धारणा सार्वजनिक गर्नु भएको हो ।
मसालले प्रेस वक्तव्यमार्फत जेनजी आन्दोलनको बेलामा भएका तोडफोड, आगजनी तथा ध्वंसात्मक कार्यहरूको विस्तृत र निष्पक्ष तरिकाले छानवीन गरेर दोषीमाथि कारवाही गर्नुपर्ने माग गरेको छ ।
प्रतिगमनका विरुद्ध समान समझदारी कायम हुने राजनीतिक शक्तिहरूसँग कार्यगत एकता वा तालमेल गर्ने ठेगान गरेको प्रेस वक्तव्यमा उल्लेख छ ।
प्रेस वक्तव्यमा उल्लेख छ :
“आज बसेको नेपाल कम्युनिस्ट पार्टी (मसाल) पीवीको बैठकले गरेका महत्वपूर्ण निर्णयको जानकारी तथा सार्वजनिक गर्नका लागि यो प्रेस वक्तव्य जारी गरिएको छ ।
१. बैठकमा सरकारद्वारा घोषित चुनावबारे छलफल भयो । त्यो चुनावबारे स्थिति स्पष्ट भएपछि केन्द्रीय कमिटीले अर्को बैठकमा ठेगान गर्ने निर्णय भएको छ ।
२. देशमा हालै जेनजी आन्दोलनको बेलामा भएका तोडफोड, आगजनी तथा ध्वंसात्मक कार्यहरूबारे विस्तृत रुपमा छलफल भयो । बैठकले त्यसबारे विस्तृत रूपले र निष्पक्ष तरिकाले छानवीन गरेर दोषीमाथि कारवाही गर्नुपर्ने माग गरेको छ ।
३. प्रतिगमनका विरुद्ध समान समझदारी कायम हुने राजनीतिक शक्तिहरूसँग कार्यगत एकता वा तालमेल गर्ने ठेगान भएको छ । तर त्यसका लागि पहिले केन्द्रीय स्तरमा समझदारी भएपछि नै जिल्लाहरूमा त्यसअनुसार कार्यगत एकता वा सहकार्य गरेर जान सक्ने छन् । तर असंवैधानिक प्रकारले मन्त्रीपरिषद गठन गरेको, संसदको विघटन गरेको समेतका विषयमा जिल्ला स्तरमा वा जनवर्गीय मोर्चाहरूको स्तरमा पनि वक्तव्य दिने सकिने छ । तर त्यसो गर्दा राजावादी र कथित स्वतन्त्र पार्टीसित कुनै पनि तालमेल वा सहकार्य गरिने छैन । “
२०८२ असोज ०५ गते ।
