काठमाडौँ । अन्तरिम सरकार गठन र संसद् विघटनलाई प्रतिगमन बताउँदै नेपाल कम्युनिस्ट पार्टी (मसाल) ले राजनीतिक भेटघाट सुरु गरेको छ ।
काठमाडौँमा मसालका केन्द्रीय प्रतिनिधि भैरवराज रेग्मीले २०८२ असोज ३ गते शुक्रबारदेखि भेटघाट सुरु गर्नुभएको हो ।
रेग्मीको अनुसार आजै क्रान्तिकारी कम्युनिस्ट पार्टीका नेताहरू सी.पी. गजुरेल र सन्तबहादुर नेपालीसित भेटघाट सम्पन्न भएको छ ।
सो पार्टीको कार्यालय कुपन्डोलमा भएको भेटघाटमा दुवै पार्टीका नेताहरूमाझ देशमा प्रतिगमन भएको समान धारणा कायम गरेको रेग्मीले बताउनुभयो ।
‘भेटघाटमा संसद्बाहिरबाट अन्तरिम सरकार गठन र संसद् विघटन हुनु दुवै प्रतिगमन भएको समान धारणा कायम भयो’ उहाँले भन्नुभयो– ‘लोकतान्त्रिक शक्तिहरू एकजुट नहुने हो भने देशमा राजनीतिक दलमाथि प्रतिबन्ध लाग्न सक्ने हाम्रो अनुमान थियो ।’
रेग्मीले गणतन्त्र र संविधानको रक्षाका लागि सम्पूर्ण शक्तिहरू एक भएर जानुपर्नेमा एकमत भएको उहाँले भनाइ थियो ।
उहाँका अनुसार वर्तमान परिस्थितिमा प्रतिगमन भएको धारणा राख्ने कम्युनिस्ट पार्टी वा अन्य राजनीतिक दलसँग पनि भेटघाट जारी रहनेछ ।
उहाँले भोलि शनिबार नेकपा (एकीकृत समाजवादी) पार्टीका प्रतिनिधिसँग भेटघाट हुनेछ भने सँगसँगै नेकपा (माओवादी केन्द) सहित अन्य कम्युनिस्ट पार्टी तथा अन्य लोकतन्त्र पक्षधर राजनीतिक पार्टीसित भेटघाट हुनेछ ।
