काठमाडौँ । संविधान दिवसप्रति अखिल नेपाल युवक संघले सम्पूर्ण नेपाली जनतालाई शुभकामना व्यक्त गरेको छ ।

सङ्घका केन्द्रीय अध्यक्ष गणेश अधिकारीले २०८२ असोज ३ गते एक वक्तव्य जारी गरी संविधानप्रतिको सम्मान, यसको संरक्षण र परिस्कृत गर्दै अगाडि लैजानु पर्ने आवश्यकतामा जोड दिनुभएको छ ।

‘वर्तमान संविधानले जनताको केही अधिकारलाई सुनिश्चित गरेको छ, तर अझै वर्गीय असमानताका खाडलहरू कायम नै छ ।’ अधिकारीले वक्तव्यमा लेख्नुभएको छ– ‘प्राप्त जनाधिकारलाई रक्षा, लोकतन्त्रलाई संस्थागत, संघीयता गर्दै निरन्तर र निर्मम वर्गसंघर्षले मात्र देशलाई जनगणतन्त्रको दिशामा अगाडि बढाउन सकिन्छ ।’

वक्तव्यमा लेखिएको छः

“संविधान दिवसको अवसरमा अखिल नेपाल युवक संघ सम्पूर्ण नेपाली जनतालाई शुभकामना अर्पण गर्दछौँ । साथै संविधानप्रतिको सम्मान, यसको संरक्षण र परिस्कृत गर्दै अगाडि लैजानु पर्ने आवश्यकतामा जोड दिन्छ ।

नेपालको संविधान कुनै शासकद्वारा उपहार स्वरूप आएको होइन, यो जनताको लामो संघर्ष, बलिदान र ऐतिहासिक आन्दोलनको परिणाम हो । २०६२/६३ को जनआन्दोलनले राजतन्त्रको निरंकुश हस्तक्षेपलाई समाप्त गर्दै नयाँ गणतान्त्रिक युगको ढोका खोलेको थियो । त्यही संघर्षकै जगमा २०७२ सालको संविधान जन्मिएको हो । तर संविधानमाथि बारम्बार हस्तक्षेप गर्ने प्रवृत्ति गहिरो रूपमा जरा गाडेर बसेको छ । त्यसैले संविधान दिवसको अवसरमा हामीले केवल उत्सव मनाउने मात्र होइन, यसको निरन्तर रक्षा र जनमुखी संविधान बनाउन लागि पनि आवाज उठाउनु पर्नेमा जोड दिनुपर्दछ ।

वर्तमान संविधानले जनताको केही अधिकारलाई सुनिश्चित गरेको छ, तर अझै वर्गीय असमानताका खाडलहरू कायम नै छ । प्राप्त जनाधिकारलाई रक्षा, लोकतन्त्रलाई संस्थागत, संघीयता गर्दै निरन्तर र निर्मम वर्गसंघर्षले मात्र देशलाई जनगणतन्त्रको दिशामा अगाडि बढाउन सकिन्छ । यही माग नै आम न्याय–प्रेमी श्रमजिबी जनता र युवाहरूको माग हो ।

तसर्थ, युवापुस्ताले संविधानको रक्षा मात्र होइन, यसको कमजोरी सच्याएर नयाँ सम्भावना निर्माण गर्नको लागि अग्रणी भूमिका खेल्नु पर्दछ । आजको दिन हामी सम्पूर्ण युवालाई आह्वान गर्दछौँ कि, संविधानलाई अस्वीकार गर्ने प्रतिगामी प्रवृत्ति र संविधानलाई पूर्ण भनेर महिमामण्डन गरेर आत्मसन्तुष्टिमा रमाउने दुबै गलत कुरा हुन् ।

बर्तमान संविधानलाई जनआन्दोलनको उपलब्धि स्वरूप स्वीकार्दै, यसको सुधार, सुदृढीकरण र जनगणतान्त्रिक संविधान प्राप्तको लागि निरन्तर संघर्ष जारी राख्नु पर्दछ । संविधानको वास्तविक संरक्षण तब मात्र सम्भव हुन्छ, जब युवा पुस्ताले संघीयता खारेजी, भ्रष्टाचार, रोजगारी, निरंकुशता, असमानता र वैदेशिक हस्तक्षेप विरुद्ध एकताबद्ध भई निरन्तर प्रतिरोध गरिरहन्छन् ।

यस संविधान दिवसमा अखिल नेपाल युवक संघ सबैलाई यही सन्देश दिन चाहन्छ कि संविधानको रक्षा, लोकतन्त्रको संस्थागत विकास र नयाँ जनगणतान्त्रिक नेपाल निर्माणका लागि युवापुस्ताले अझ सबल, सचेत र प्रतिबद्ध भइ वर्ग संघर्षलाई निरन्तर अघि बढाएर मात्र देशले मुहार फेर्ने छ ।”