काठमाडौँ । नेकपा (मसाल) ले २०७२ सालको संविधानको रक्षामा विशेष जोड दिन अपिल गरेको छ ।

एघारौँ संविधान दिवसको अवसरमा २०८२ असोज ३ गते शुक्रबार प्रेसवक्तव्य जारी गर्दै मसालले सो अपिल गरेको हो ।

महामन्त्री मोहनविक्रम सिंहको हस्ताक्षरमा जारी प्रेसवक्तव्यमा वर्तमान संविधानलाई सैद्धान्तिक र रणनीतिक रूपमा स्वीकार नगर्ने उल्लेख गरिएको छ । यस सन्दर्भमा आफूहरूको जाड नयाँ जनवादी क्रान्ति सम्पन्न गर्नेतर्फ रहेको स्पष्ट पारिएको छ ।

त्यस्तै, संविधानमा उल्लेख सङ्घीयताप्रति आफूहरूको विरोध रहेको स्मरण गराइएको छ ।

त्यसका बाबजुद मसालले राजावादी र अहिलेको जेनजी आन्दोलनको क्रममा समेत गैरदलीयता वा संविधानको पुनर्लेखनजस्ता विषय उठाएर गैरदलीय सरकार गठन र संसद् विघटन गर्दै संविधानमाथि हमला भइरहेकाले त्यसको रक्षा हुनुपर्ने धारणा व्यक्त गरिएको छ ।

यस्तो छ, प्रेसवक्तव्यको पूर्ण पाठ :

“आजको संविधान दिवसलाई नेकपा (मसाल) ले स्वागत गर्दछ र संविधानको रक्षा गर्नुपर्ने आवश्यकतामा विशेष जोड दिन्छ । त्यसप्रति हामीले सम्पूर्ण जनताको पनि ध्यान आकर्षित गर्न चाहन्छौँ ।

वर्तमान संविधानलाई सैद्धान्तिक र रणनीतिक रूपले हामीले स्वीकार गर्दैनौँ र त्यसको ठाउँमा वर्तमान अवस्थामा अर्थात् अहिलेको अर्धसामन्ती र अर्धऔपनिवेशिक अवस्थामा आमूल परिवर्तन गरेर नयाँ जनवादी क्रान्ति सफल पार्ने र त्यसरी देशमा नयाँ जनवादी गणतन्त्र कायम गर्नुपर्ने आवश्यकतामा जोड दिन्छौँ तर हाम्रो यो पनि स्पष्ट र दृढ विचार छ कि देशको अहिलेको ठोस परिस्थितिमा वर्तमान संविधान, गणतन्त्र, धर्मनिरपेक्षतासमेतको प्रगतिशील महत्त्व छ र त्यसैले हामीले वर्तमान संविधानको रक्षा गर्नुपर्ने आवश्यकतामा जोड दिन्छौँ । त्यसका साथै हामीले यो कुरा पनि स्पष्ट गर्न चाहन्छौँ कि विद्यमान संविधानमा व्यवस्था गरिएको सङ्घीयताप्रति हाम्रो पूरा विरोध छ । हामीले त्यसलाई खारेज गरेर प्रजातान्त्रिक विकेन्द्रीयता र स्थानीय स्वायत्त शासनमाथि आधारित एकात्मक प्रणाली कायम हुनुपर्दछ भन्ने कुरामा जोड दिन चाहन्छौँ ।

देशमा राजावादी र अन्य कतिपय पक्षले संविधानमाथि आक्रमण गर्दै आएका छन् । जेनजी आन्दोलनपछि पनि एक वा अर्को प्रकारले संविधानमाथि हमला बढेर गएको छ । उनीहरूले कुनै बेला संविधानलाई पुनर्लेखन गर्ने कुरामा जोड दिन्छन् भने कुनै बेला संविधानमा व्यवस्था गरिएको दलीय प्रणालीलाई पूरै समाप्त गर्ने कुरा गर्दछन् । अहिले जसरी संविधानको प्रावधानलाई अतिक्रमण गरेर मन्त्रिमण्डलको गठन वा संसद्लाई विघटन गर्ने काम गरियो र गैरदलीय आधारमा मन्त्रिमण्डलको गठन गरियो, त्यसबाट उनीहरूले एक वा अर्को प्रकारले संविधानमाथि आक्रमण गर्न खोजिरहेको कुरा नै बुझिन्छ । त्यस्तो अवस्थामा संविधान वा त्यसअन्तर्गत गणतन्त्र, धर्मनिरपेक्षता र दलीय व्यवस्थाको रक्षाको प्रश्न एकदम अहम् प्रश्न बन्न गएको छ ।

आज संविधान दिवसको अवसरमा हाम्रो पार्टीले संविधानको रक्षाका लागि विशेष जोड दिन र त्यसका लागि सम्पूर्ण जनतालाई अगाडि आउन अपिल गर्दछ ।”