अर्घाखाँची । उदेश्य भन्दा बाहिर गएर विभिन्न राजनीतिक दल, सरकारी कार्यालय एवंं निजी घर र भौतिक संंरचनाहरू नष्ट गर्ने कार्य निन्दनीय भएको राष्ट्रिय जनमोर्चा अर्घाखाँचीले बताएको छ ।
‘जेनजी पुस्ताको आन्दोलनको उदेश्यभन्दा बाहिर विभिन्न जिल्लामा रहेका अन्य राजनीतिक दल, सरकारी कार्यालय र निजी घर एवं सरकारी गाडीमा समेत तोडफोड, आगजनी र चोरी भएको कार्यप्रति राष्ट्रिय जनमोर्चा अर्घाखाँचीले खेद प्रकट गर्दछ’ जिल्ला उपाध्यक्ष गोपाल पौडेलले असौज १ गते जारी विज्ञप्तिमा उल्लेख छ– ‘देशमा ठुला भनिने राजनीतिक दलहरूले वि.सं. २०४६ सालपछि चरम भ्रष्टाचार, विभेद, बेथिति, कू–शासन, स्वयच्छाचारी क्रियाकलापले गर्दा नेपाली जनताले वर्तमान परिस्थितीको परिणाम बेहोर्नुपरेको छ ।’
विज्ञप्तिमा लेखिएको छः
“वि.सं. २०८२ साल भाद्र २३ र २४ गते भएको जेनजी पुस्ताको आन्दोलनबाट सिर्जित घटनाक्रमप्रति हाम्रो पार्टी राष्ट्रिय जनमोर्चा अर्घाखाँचीको ध्यानाकर्षण भएको छ । सर्वप्रथम उक्त आन्दोलनको क्रममा ज्यानको आहुती दिने अर्घाखाँचीको भूमिकास्थान–४, फलामखिल्ली धारापानीका माधव सारु सहित सम्पूर्ण युवाहरूप्रति भावपूर्ण श्रदाञ्जली व्यक्त गर्दछौँ । साथै शोकाकुल परिवारजनमा हार्दिक समवेदना प्रदान गर्दछौँ । आन्दोलनकै क्रममा भएका सम्पूर्ण घाइतेहरूको शिघ्र स्वास्थ्यलाभको कामना गर्दछौँ । मृतकको दाहसंस्कार, परिवारलाई राहत र घाईतेको उपचारको सम्पूर्ण व्यवस्थापन निःशुल्क रुपमा गर्नपनि हामीले सरकारसँग जोडदार माग गर्दछौँ ।
हाम्रो पार्टी राष्ट्रिय जनमोर्चाको स्पष्ट धारणा छ कि जेनजी पुस्ताको आन्दोलन वास्तवमा देशको चरम भ्रष्टाचारको अन्त्य र सामाजिक सञ्जालमाथि सरकारले लगाएको प्रतिबन्धका बिरुद्ध भनिएको थियो । भष्टाचारको अन्त्य गरि देशमा सुशासन कायम गर्न खोज्नु आन्दोलनको सकरात्मक पक्ष हो । नेपालका ठुला भनिने राजनीतिक दलहरू वि.सं. २०४६ सालपछि पटक–पटक सरकारमा बस्दा भएको चरम भ्रष्टाचार, बलात्कार, हिंसा, विभेद, बेथिति र कू–शासन जस्ता जघन्य अपराधलाई संरक्षण गर्ने र सत्तामा बस्दा स्वयच्छाचारी हुने क्रियाकलापले गर्दा आज यो परिणाम सिर्जना भएको छ । मूलुकमा विभिन्न समयमा भएका संघर्ष र आन्दोलनको परिवर्तनपछि गणतन्त्र प्राप्त भएको छ । यि उपलब्धिहरूलाई संस्थागत गर्नुनै अहिलेको हाम्रो मुख्य जिम्मेवारी रहेको छ । यो कार्यमा जेनजी पुस्ताहरूको पनि महत्वपूर्ण भूमिका हुन्छ र हुनुपर्दछ भन्ने हाम्रो ठहर छ । जेनजी पुस्ताले गरेको आन्दोलनका सकरात्मक पक्षहरूमाथि घुसपैठ गरि देशमा ठुलो जनधनको क्षति हुन पुगेको छ । यसप्रति हाम्रो पार्टीको गम्भिर ध्यानाकर्षणा भएको छ ।
अर्घाखाँचीमा पनि जेनजी पुस्ताको आन्दोलनको उदेश्यभन्दा बाहिर गएर हाम्रो पार्टीको कार्यालय सहित जिल्लामा रहेका अन्य राजनीतिक दल, सरकारी कार्यालय र निजी घर एवं सरकारी गाडीमा समेत तोडफोड, आगजनी र चोरी भएको छ । यस प्रकारको अमानविय कार्यप्रति हाम्रो पार्टी राष्ट्रिय जनमोर्चा खेद प्रकट गर्दछ । साथै सार्वजनिक एवं निजी सम्पत्तिमाथि गरिएको तोडफोड, आगजनी र चोरीको घटनाको सम्बन्धमा निष्पक्ष छानबिन गरी दोषिलाई कानूनी कारवाहीको दायरामा ल्याउन सम्बन्धित निकायलाई ध्यानाकर्षण गराउँदछौँ । यस विशम् परिस्थितिमा पार्टीका कार्यकर्ता, शुभचिन्तक, जेनजी पुस्ता र आम नागरिकहरूमा संयम र धैर्य रहि वातावरणः सहज बनाउनका लागि अपिल गर्दछौँ । आगामी दिनमा जिल्लामा हुने सबैखाले वेथिति, अन्याय, अत्याचार, भष्टाचार र कु–शासनका विरुद्ध तथा जिल्लाको समृद्धिका निम्ती सबै हातेमालो गर्दै अगाडि बढ्ने प्रतिबद्धता सहित यी प्रेस विज्ञप्ति जारी गरिएको छ ।”
