काठमाडौँ । जेनजी आन्दोलन देशको राजनीतिमा ल्याएको राजनीतिक उथलपुथल पछि प्रधानमन्त्रीमा शुशिला कार्की नियुक्तसँगै विभिन्न पक्षमा आकांक्षा राख्नेहरू पनि कम छैनन् ।
कैयौँले मन्त्री बन्ने होडमा छन् भने, कर्मचारीहरूमा पनि बढुवा र उच्च पदस्थमा पुग्न चाहनेहरूको आकांक्षा सार्वजनिक रुपै मै बाहिर आइरहेका छन् । प्रधानमन्त्रीका श्रीमान् दुर्गा सुवेदीका अनुसार उनका सामु मन्त्री बनाउन प्रस्ताव लिएर जानेको व्यापक भिड लाग्ने गरेको छ ।
त्यसरी जानेमा धरान उपमहानगरपालिकाका नगरप्रमुख हर्कराज राई (साम्पाङ)देखि पूर्वप्रहरी महानिरीक्षक सर्वेन्द्र खनालसम्म छन् । त्यस्तै यसभन्दा पहिला कुनै क्षेत्रमा नामै नुनिएका व्यक्तिहरू पनि मन्त्री बन्नका लागि प्रधानमन्त्रीमा शुशिला कार्कीका श्रीमान दुर्गा सुवेदीका समक्ष पुगेको प्रधानमन्त्री निकट स्रोत बताउँछ ।
कार्कीले अहिलेसम्म महान्यायाधिवक्तामा सविता बराल भण्डारी नियुक्त गर्नुबाहेक सचिवालयमा आधिकारिक रूपमा कसैलाई पनि नियुक्त गरेकी छैनन् । अहिले धेरै काममा उनका श्रीमान् सुवेदीले सघाइरहेका स्रोत बताउँछ । सुवेदीले धेरै पहिला नेपाली कांग्रेसको राजनीति गरेका थिए ।
कार्कीले नेपाली सेनाका पूर्वरथी बालानन्द शर्मा, केदारभक्त माथेमा, विद्यानाथ कोइराला, डा. भगवान् कोइराला, डा. रामेश कोइराला, डा. भोला रिजाललाई मन्त्री बनाउन छलफल जारी रहेको बताइन्छ ।
विभिन्न सामाजिक सञ्जाल र मिडियाहरूमा आएर आफूलाई मन्त्री बनाउनु पर्ने हर्क साङ्पाङ, लोकगायक शंकर क्षेत्री, ऋषी धमला लगायतले धारणा राख्दै आएका छन् । डा. सुरेन्द्र केसीले पनि एउटा अन्तर्वार्तामा बोल्दै आफुलाई मन्त्री बन्नलाई कसैले प्रस्ताव नगरेकोमा गुनासो समेत गरेका छन् ।
त्यस्तै आफूले समर्थन गर्दैआएको सोही पार्टीबाट सांसद समेत रहेकी सुमोना श्रेष्ठले राजीनामा दिएर मन्त्री बन्ने लाइनमा रहेको बताइएको छ ।
