काठमाडौँ । ओमप्रकाश अर्याल, कुलमान घिसिङ र रामेश्वर खनालको आज भदौ ३० गते सोमबार शपथ ग्रहण हुने भएसँगै उता मध्यरातमा जेनजीको प्रदर्शन भएको छ ।
भदै २९ गते साँझ प्रधानमन्त्री सुशीला कार्कीले तीन जनालाई मन्त्रीमा नियुक्त गरेसँगै सुधन गुरुङलाई गृहमन्त्री बनाउनुपर्ने माग राख्दै मध्यरातमा बालुवाटारमा जेनजीले प्रदर्शन गरेका हुन् ।
अन्तरिम सरकारका तीन नयाँ मन्त्री अर्याल, घिसिङ र खनालको शपथ सोमबार हुँदैछ । नवनियुक्त प्रधानमन्त्री सुशीला कार्कीले आइतबार साँझ तीन सदस्यीय मन्त्रिपरिषद् विस्तार गरेकी हुन् ।
नेपाल विद्युत् प्राधिकरणका पूर्व कार्यकारी निर्देशक कुलमान घिसिङलाई ऊर्जा, जलश्रोत तथा सिँचाइ मन्त्रालयको जिम्मेवारी दिइएको छ ।
ओमप्रकाश अर्याललाई गृहसहित कानुन मन्त्रालयको जिम्मेवारी दिइएको छ । अर्याल पछिल्लो समय काठमाडौँ महानगरपालिकाका प्रमुख बालेन शाहको कानुनी सल्लाहकार हुन् ।
रामेश्वर खनाललाई अर्थ मन्त्रालयको जिम्मेवारी दिइएको छ । उनी पूर्वअर्थसचिव हुन्।
यता कानुन तथा गृहमन्त्रीको रूपमा अधिवक्ता अर्याललाई शपथ गराउने तयारी गरेपछि जेनजीले बालुवाटारमै प्रदर्शन गरेका छन् ।
आन्दोलनको सफलतापछि सहजकर्ताको रूपमा उदाएका अर्याललाई गृहमन्त्री दिनुनहुने र जेनजी अगुवा नै गृहमन्त्री बन्नुपर्ने अडान केही युवाको माग छ ।
जेनजीका अगुवा सुजन गुरुङ नै गृहमन्त्री बन्नुपर्ने र नबने अर्को युवालाई पठाउनुपर्ने माग भइरहेका बेला केही युवाले भने गुरुङका गतिविधिप्रति आक्रोश व्यक्त गरेका छन् ।
