काठमाडौँ । नेकपा (मसाल) ले संसद् विघटन गरी अन्तरिम सरकार गठन गर्ने राष्ट्रपति कदको कडा शब्दमा विरोध गरेको छ ।
महामन्त्री मोहनविक्रम सिंहको हस्ताक्षरमा २०८२ भदौ २८ गते प्रेसवक्तव्य जारी गर्दै मसालले सो धारणा व्यक्त गरेको हो ।
पूर्व प्रधानन्यायाधीश सुशीला कार्कीबारे व्यक्तिगत रूपमा मसाललाई केही भन्नु नरहेको बताउँदै वक्तव्यमा उनलाई प्रधानमन्त्री बनाउन संविधान मिचिएकोमा विरोध गरिएको छ ।
त्यस्तै, प्रधानमन्त्री कार्कीले संसद् विघटनको प्रस्ताव गर्नुलाई पनि मसालले गलत मानेको छ ।
पार्टीले संविधानमाथि हमला गर्ने कार्यलाई प्रतिगामी ठहर गर्दै त्यसको विरुद्ध उच्च प्रकारको सतर्कता अपनाउन आग्रह गरेको छ ।
यस्तो छ, प्रेसवक्तव्यको पूर्ण पाठ :
“१. नेकपा (मसाल) को हिजो भाद्र २७ गते बसेको पिबीको बैठकले देशमा हालै चलेको जेनजी आन्दोलन, घटनाक्रम र देशव्यापी रूपमा भएका ध्वंसात्मक कार्यसमेतको विस्तृत रूपले विश्लेषण गरेर आÇनो वक्तव्य जारी गरिसकेको छ ।
२. हिजोको वक्तव्यमा हामीले संसद्बाहिरबाट कुनै सरकारको गठन गर्ने वा संसद्को विघटन गर्नेजस्ता कुनै कार्य गरिएमा त्यसको विरोध गर्ने कुरा स्पष्ट गरेका थियौँ । हाम्रो वक्तव्य भएको केही समयमा नै पूर्व प्रधानन्यायाधीश सुशीला कार्कीलाई प्रधानमन्त्रीमा नियुक्त गरियो र संसद्लाई समेत विघटन गरियो । उक्त दुबै कार्यको हाम्रो पार्टीले कडा शब्दमा विरोध गर्दछ ।
३. जेनजी आन्दोलनलाई आफ्नो प्रतिगामी उद्देश्यका पक्षमा लैजान राजावादीले पूरा शक्ति लगाएका थिए । त्यसमा उनीहरू पूरा सफल ता भएनन् तर संसद् विघटनले उनीहरूको प्रतिगामी उद्देश्यलाई केही मदत अवश्य पनि पुगेको छ । त्यसकारण अन्तरिम सरकारको गठन र संसद् विघटनबाट प्रतिगामी शक्तिलाई मदत पुग्न नपाओस् । त्यसका लागि उच्च प्रकारको सतर्कताको आवश्यकता छ ।
४. पूर्व प्रधानन्यायाधीश सुशीला कार्कीका विरुद्ध व्यक्तिगत रूपमा हामीलाई केही भन्नु छैन तर उनलाई प्रधानमन्त्री नियुक्त गर्दा संविधानलाई जसरी मिचिएको छ, त्यसप्रति हाम्रो आपत्ति छ । त्यसका साथै उनी प्रधानमन्त्री नियुक्त भएपछि उनको पहिलो निर्णय नै संसद् विघटन गर्न राष्ट्रपतिलाई सुझाव दिने भएको छ । त्यो कार्यको पनि हामीले कडा शब्दमा विरोध गर्दछौँ ।”
