काठमाडौँ । अखिल नेपाल जनजाति सम्मेलनले संविधान र संसद्मामार्फत् वर्तमान विषम राजनीतिक परिस्थितिको निकास खोज्नुपर्ने धारणा व्यक्त गरेको छ ।
अध्यक्ष निमबहादुर बुढाथोकीको हस्ताक्षरमा २०८२ भदौ २६ गते राति जारी प्रेसवक्तव्यमा सो धारणा प्रस्तुत गरिएको हो ।
नेपाली जनता र आदिवासी जनजातिको आन्दोलनबाट लोकतान्त्रिक गणतन्त्र, धर्मनिरपेक्षता र समानुपातिक समावेशिताजस्ता उपलब्धि प्राप्त भएको बताउँदै वक्तव्यमा अब यीभन्दा अझै प्रगतिशील बाटोतर्फ अघि बढ्नुपर्ने आवश्यकतामा जोड दिइएको छ ।
यस्तो छ, प्रेसवक्तव्यको पूर्ण पाठ :
“हाम्रो सङ्गठन अखिल नेपाल जनजाति सम्मेलनको अहिले देशमा उत्पन्न घटनाप्रति ध्यानाकर्षण भएको छ । अहिलेको संविधानले व्यवस्था गरेको लोकतान्त्रिक गणतन्त्र, धर्मनिरपेक्षता, समानुपातिक समावेशिता नेपालको इतिहासमा नेपाली जनता, आदिवासी जनजातिले विभिन्न आन्दोलन, सङ्घर्ष र बलिदानबाट प्राप्त गरेका उपलब्धिको जगमा उभिएको हो । त्यसैले आजसम्म प्राप्त भएका जे जति उपलब्धि छन्, तीभन्दा थप प्रगतिशीलतार्फ जाने बाटो नै आजको राजनीतिक सङ्कटको सही निकास हो तर अहिले प्रतिगामी शक्ति र बाह्य चलखेल भइरहेका छन् । यसलाई रोक्नका लागि पनि सतर्कताका साथ राजनीतिक निकास आवश्यक छ । संसद् विघटन गर्नेजस्ता खतरनाक चलखेल चलेको छ । संविधान फाल्ने कोसिस भइरहेको छ । जनताले चुनेका जनप्रतिनिमूलक वैधानिक संस्था संसद् रहेको हुँदा यो सङ्कटको निकास पनि संविधानसम्मत प्रक्रियामार्फत नै खोजिनुपर्दछ । राष्ट्रपतिले सङ्कट समाधानमा पहलकदमी लिनुपर्छ र संसद्मार्फत नै संविधानसम्मत निकास खोजिनुपर्छ भन्ने हाम्रो धारणा छ ।”
