काठमाडौँ । राष्ट्रपति रामचन्द्र पौडेलले संवैधानिक दायिराभित्रैबाट अहिलेको विषम राजनीतिक परिस्थितिको निकास खोज्ने विमर्श र प्रयास भइरहेको बताउनुभएको छ ।
आज २०८२ भदौ २६ गते बिहीबार प्रेसविज्ञप्ति जारी गर्दै राष्ट्रपति पौडेलले सो जानकारी दिनुभएको हो ।
उहाँले आन्दोलनकारी नागरिकको माग सम्बोधन गर्न छिटोभन्दा छिटो समस्याको समाधानको खोजी भइरहेको जिकिर गर्नुभएको छ ।
मुलुकमा शान्तिसुव्यवस्था कायम गर्ने काममा सहयोग गर्न सबै पक्षलाई संयमता अपनाउन उहाँले अपिलसमेत गर्नुभएको छ ।
विज्ञप्तिमा भनिएको छ :
“देशको अहिलेको विषम परिस्थितिमा मुलुकलाई संवैधानिक दायरामा रहेर कसरी निकास दिन सकिन्छ र मुलुकमा लोकतन्त्रको संरक्षण तथा शान्तिसुव्यवस्था कसरी कायम गर्न सकिन्छ भनेर म विचारविमर्श एवम् हर प्रयास गर्दैछु । आन्दोलनकारी नागरिकको माग सम्बोधन गर्न छिटोभन्दा छिटो समस्याको निदानको खोजी भइरहेको कुरामा विश्वस्त हुन र संयमतापूर्वक मुलुकमा शान्तिसुव्यवस्था कायम गर्ने काममा सहयोग गर्न सबै पक्षलाई अपिल गर्दछु ।”
भदौ २४ गते जेनजी प्रदर्शनकारीले शीतलनिवासमा आगजनी गरेपछि सेनाको हेलिकोप्टरमा उहाँलाई नागार्जुन लगिएको सञ्चारमाध्यममा समाचार बाहिरएको थियो तर त्यसयता उहाँले सार्वजनिक रूपमा देखा पर्नुभएको छैन, न त राष्ट्रको नाममा सम्बोधन नै गर्नुभएको छ ।
सामाजिक सञ्जालमा राष्ट्रपति पौडेलको राष्ट्रको नाममा सम्बोधन आउनुपर्ने माग बढिरहेका बेला उहाँको यो वक्तव्य सार्वजनिक भएको हो ।
