काठमाडौँ । सोमबार बिहान ११ बजेबाट जेन–जी पुस्ताले गरेको भ्रष्टाचार, बेतिथि, नेपोकिड्स र सामाजिक सञ्जाल बन्दको विरुद्धमा आन्दोलनको रापले केपी शर्मा ओलीले प्रधानमन्त्री पद नै गुमाउनु परेको छ ।
जेन–जी पुस्ताले गरेको आन्दोलनको राप यति बढ्यो कि आन्दोलन सुरु भएको २७ घण्टामै प्रधानमन्त्री पदबाट केपी शर्मा ओली बहिर्गमन हुनु पर्यो ।
सोमबारको आन्दोलनमा प्रहरीको व्यापक दमन र गोलिबारीबाट १९ जनाले ज्यान गुमाउनु पर्यो । १९ जनाको मृत्यु र ४०० बढि घाइते भएपछि आन्दोलनको राप बढ्दै गयो ।
मंगलबार बिहानैबाट आन्दोलनमा उत्रिएका प्रदर्शनकारीले प्रधानमन्त्री केपी शर्मा ओली, पूर्वप्रधानमन्त्री शेरबहादुर देउवा, पुष्पकमल दाहाल, माधवकुमार नेपाल, डा. आरजु राणा देउवा, रघुवीर महासेठे, गगन थापालगायतको घरमा आगजनी समेत गरे ।
नयाँ बानेश्वरस्थित संसद् भवन, सिंहदरबारलगायतका सरकारी भवन ध्वस्त भए । नेपाली कांग्रेस, नेकपा एमाले र नेकपा माओवादी केन्द्रका पार्टी कार्यालय ध्वस्त भए । त्यसका साथसाथै विभिन्न राजनीतिक पार्टीहरूका जिल्ला कार्यालय तोडफोड, आगजनी लगायतका अराजक क्रियाकलाप दिनभरी नै चलिरहेको छ ।
फलस्वरूप ओलीले राजीनामा दिन बाध्य भए । ओली २०८१ असार ३० प्रधानमन्त्रीमा नियुक्त भएका थिए । उनलाई नेपाली कांग्रेसले समर्थन गरेको थियो ।
प्रधानमन्त्री ओलीले बालुवाटार छाडे प्रधानमन्त्री केपी शर्मा ओलीले राजीनामा दिए लगत्तै बालुवाटार छाडेका छन् । बालुवाटार छाडेर उनी अज्ञातस्थलतर्फ लागेको सुरक्षा स्रोतले बताएको छ ।
राष्ट्रपति रामचन्द्र पौडेलद्वारा राजीनामा स्वीकृतः
राष्ट्रपति रामचन्द्र पौडेलले आजैदेखि लागूहुने गरी उहाँको राजीनामा स्वीकृत गर्नुभएको हो । नेपालको संविधानको धारा ७७ को उपधारा (३) बमोजिम अर्को मन्त्रिपरिषद् गठन नभएसम्म सोही मन्त्रिपरिषद्ले कार्यसञ्चालन गर्ने जिम्मेवारी तोक्नुभएको राष्ट्रपतिको कार्यालयले जनाएको छ ।
प्रशासन प्रमुख र सुरक्षा निकायका प्रमुखहरू अपिल :
नेपालका प्रशासन प्रमुख र सुरक्षा निकायका प्रमुखहरूले राजनीतिक संवादको माध्यमबाट यथाशक्य छिटो शान्तिपूर्ण समाधान निकाल्न सम्बद्ध सबैमा हार्दिक अपिल गरेका छन् ।
मुख्यसचिव एकनारायण अर्याल, प्रधान सेनापति अशोक राज सिग्देल, गृहसचिव गोकर्णमणी दुवाडी सशस्त्र प्रहरी बल, महानिरीक्षक नेपाल राजु अर्याल, नेपाल प्रहरीका महानिरीक्षक चन्द्रकुवेर खापुङ र राष्ट्रिय अनुसन्धान विभागका प्रमुख हुतराज थापाले विज्ञप्ति जारी गर्दै यस्तो आग्रह गरेका हुन् ।
