काठमाडौँ । अखिल (छैठौं) ले सरकार निर्लल्ज, गैरजिम्मेवार र संवेदनहीन बनेको आरोप लगाएको छ ।
अध्यक्ष सुवास जिसीको हस्ताक्षरमा २०८२ भदौ २४ गते प्रेसवक्तव्य जारी गर्दै अखिल (छैठौं) ले सरकारमाथि सो आरोप लगाएको हो ।
भदौ २३ गतेको जेनजी प्रदर्शनको प्रसङ्गमा अखिल (छैठौं) ले मृतकप्रति श्रद्धाञ्जली, घाइतेको शीघ्र स्वास्थ्यलाभको कामना, मृतकका परिवार र उचित राहत र घाइतेको निःशुल्क उपचारको माग गरेको छ ।
सरकारको चरित्रलाई फासिवादी भएको आरोप लगाइएको प्रेसवक्तव्यको पूर्ण पाठ यस्तो छ :
“भदौ २३ गते युवापुस्ता (जेनजी) द्वारा आयोजित प्रदर्शनको क्रममा भएको बर्बर दमनप्रति हाम्रो सङ्गठनको गम्भीर ध्यानाकर्षण भएको छ । भ्रष्टाचार, बेथिती, अव्यवस्था र सामाजिक सञ्जालको प्रतिबन्ध विरुद्धको प्रदर्शनमा प्रहरीले निर्ममतापूर्वक दमन गर्दा दर्जनौँ युवाविद्यार्थी र बालबालिकाको समेत ज्यान गएको छ भने सयौँको सङ्ख्यामा घाइते भएका छन् ।
हामीले उक्त घटनामा परी ज्यान गुमाउनुहुने सम्पूर्ण मृतकप्रति हार्दिक श्रद्धाञ्जली व्यक्त गर्दै घाइतेको शीघ्र स्वास्थ्यलाभको कामना गर्दछौँ साथै मृतकका परिवारलाई उचित राहत र घाइतेको निःशुल्क उपचारको सुनिश्चितताका लागि सरकारसँग जोडदार माग गर्दछौँ ।
वास्तवमा सार्वभौम जनताले आफ्नो अधिकारप्राप्तिको लागि सडक सङ्घर्ष र आन्दोलनमा आउनु स्वाभाविक हो । राज्य पक्षले त्यस प्रकारको आन्दोलनका मागलाई समयमै सम्बोधन गर्नु र आन्दोलनका क्रममा पनि हदैसम्मको सुरक्षा सतर्कता र संयमता अपनाउनु अनिवार्य हुन्छ । प्रदर्शनका सिलसिलामा न त राज्यले आवश्यक सतर्कता र सावधानी अपनाएको देखियो, न त उचित संयमता नै अपनायो । प्रहरीद्वारा भएको दमन अत्यन्तै निर्लज्ज, गैरजिम्मेवार र संवेदनहीन देखिएको छ । त्यस प्रकारको स्थितिले नै निकै ठुलो मानवीय क्षति हुन पुगेको छ । हामी राज्य र सरकारको यस प्रकारको फासिवादी कार्यको घोर भर्त्सना गर्दछौँ ।”
