काठमाडौँ । नेकपा (मसाल) ले हिजोको जेनजी प्रदर्शनमा सरकारले अनावश्यक बलप्रयोग गरेको निष्कर्ष निकालेको छ ।
महामन्त्री मोहनविक्रम सिंहको हस्ताक्षरमा २०८२ भदौ २४ गते मङ्गलबार जारी प्रेसवक्तव्यमार्फत् मसालले सो निष्कर्ष निकालेको हो ।
घटनाप्रति क्षोभ प्रकट गर्दै मृतकप्रति श्रद्धाञ्जली तथा शोकसन्तप्त परिवारजनप्रति समवेदना व्यक्त गरिएको सो वक्तव्यमा हिजोको घटनाका लागि सरकारको स्वेच्छाचारी कदम नै जिम्मेवार रहेको पनि बताएको छ ।
देशको तात्कालिक राजनीतिक परिस्थितिमा सही र सन्तुलित प्रकारको नीति अपनाउने आवश्यकतामा जोड दिइएको प्रेसवक्तव्यको पूर्ण पाठ यस प्रकार छ :
“हिजो जेनजीको आन्दोलनको दौरानमा सरकारले गरको क्रुर दमनको कार्यप्रति नेकपा (मसाल) ले गम्भीर प्रकारको क्षोभ प्रकट गर्दछ र सबै मृतकप्रति श्रद्धाञ्जली, उनीहरूका सन्तप्त परिवारजनप्रति हार्दिक समवेदना प्रकट गर्दै सबै घाइतेप्रति शीघ्र स्वास्थ्यलाभको कामना गर्दछ ।
हाम्रो पार्टीले पहिले नै यो स्पष्ट गरेको थियो कि सामाजिक सञ्जाललाई नियमन गर्नु आवश्यक थियो । त्यसबारे सर्वोच्च अदालतले पनि परमादेश दिएको थियो तर सर्वोच्च अदालतले त्यसबारे कानुन बनाएर नै नियमन गर्न निर्देशन दिएको थियो । सर्वोच्च अदालतको त्यो निर्देशनअनुसार नगरेर सरकारले दर्ता गर्ने सूचनालाई पालना नगरेको भन्दै एकैसाथ उनीहरूमाथि रोक लगाउने काम गऱ्यो । सरकारको त्यस प्रकारको स्वेच्छाचारी कारबाहीका कारणले नै जनतामा व्यापक आक्रोश उत्पन्न भयो । त्यसकारण हिजोको घटनाका लागि मुख्य रूपले सरकार नै जिम्मेवार छ ।
हिजोको प्रदर्शनलाई दबाउनका लागि सरकारले शक्तिको अनावश्यक रूपले बढी प्रयोग गरेको छ । त्यसैको परिणाम हो कि हिजोको आन्दोलनको सिलसिलामा १९ जनाको मृत्यु भएको छ भने ४०० भन्दा बढी व्यक्ति घाइते भएका छन् । उनीहरूमध्ये कैयौँ जना गम्भीर घाइते छन् । यति ठुलो दमनको लागि हाम्रो पार्टीले कडा शब्दमा सरकारको विरोध र भर्त्सना गर्दछ । हिजोको जेनजीको आन्दोलन र सरकारको दमनसित सम्बन्धित विभिन्न पक्षबारे हाम्रो पार्टीले गम्भीरतापूर्वक अवलोकन गरिरहेको छ र पार्टीको उच्च स्तरीय बैठक बसेर साँझसम्म हाम्रो पार्टीले आफ्नो नीति बाहिर ल्याउनेछ ।
हिजोको घटनाक्रम सामान्य होइन र त्यो अत्यन्त गम्भीर प्रकारको रहेको छ । त्यो एउटा राष्ट्रिय महत्त्वको प्रश्न बनेको छ । त्यसकारण त्यसबारे हामीले अन्य पक्षसित पनि छलफल गरेर एउटा साझा समझदारी बनाउन प्रयत्न गर्नेछौँ ।
अन्तमा, अहिले देशमा जुन प्रकारको राजनीतिक स्थिति उत्पन्न भएको छ, त्यसबारे सही र सन्तुलित प्रकारको नीति अपनाउन नसकेमा त्यसका दूरगामी र गम्भीर प्रकारका दुष्परिणाम हुने सम्भावनालाई अस्वीकार गर्न सकिन्न । विभिन्न देशी वा विदेशी प्रतिक्रियावादी शक्तिले यो स्थितिलाई आफ्ना निहित स्वार्थका लागि प्रयोग गर्ने प्रयत्न पनि गर्न सक्दछन् । त्यसप्रति पनि हाम्रो गम्भीर ध्यान जानुपर्ने आवश्यकता छ ।”
