काठमाडौँ । प्रधानमन्त्री केपी शर्मा ओलीले प्रतिबन्ध लगाइएका सामाजिक सञ्जाल नियमनबिना खोल्न नसकिने अडान लिएका छन् भने काङ्ग्रेस सभापति शेरबहादुर देउवा खोल्ने पक्षमा रहँदा यतिखेर दुवैबिच वार्ता चलिरहेको छ ।
आज २०८२ भदौ २३ गते सोमबार साँझ मन्त्रिपरिषद् बैठक अगाडि बसेको नेपाली काङ्ग्रेस पदाधिकारी तथा पूर्व पदाधिकारीको बैठकले सामाजिक सञ्जालमाथि लगाइएको प्रतिबन्ध खोल्न सरकारलाई आग्रह गर्ने निर्णय गरेको थियो ।
स्वास्थ्य तथा जनसङ्ख्यामन्त्री प्रदीप पौडेलले पार्टीनिर्णयबारे प्रधानमन्त्री ओलीलाई जानकारी दिएका थिए ।
‘जे क्षति भयो, त्यो क्षतिअनुसार आजको मन्त्रिपरिषद् बैठक बस्दै गर्दा आन्दोलनकारीको मागबारे केही न केही सम्बोधन गर्नुपर्छ’ पौडेलको प्रस्तावबारे भनिएको छ– ‘त्यो सम्बोधन गर्ने क्रममा सामाजिक सञ्जाल दर्ता कूटनैतिक ढङ्गले पहल गर्दै जाने र तत्काललाई खोल्ने निर्णय गर्नुपर्छ ।’
प्रधानमन्त्री ओलीले भने यथास्थितिमा प्रतिबन्ध हटाउन नसकिने जवाफ दिएका थिए ।
‘सभापपतिज्यूले पनि भन्नुभएको थियो तर कम्पनीले खुलेआम रूपले दर्ता गर्दैनौँ भनिरहका छन् । नियमन नगरी यतिकै खोल्न सकिँदैन’ प्रधानमन्त्री ओलीले बैठकमा भनेका थिए ।
यसपछि गृहमन्त्री पदबाट राजीनामा दिँदै रमेश लेखकले पनि सामाजिक सञ्जालको प्रतिबन्ध खोल्न प्रस्ताव राखेका थिए । फेरि पनि प्रधानमन्त्री ओलीले मानेनन् ।
‘तपाईंहरूले राखेको प्रस्तावमा सकारात्मक छु भन्नुभयो’ एक मन्त्रीले प्रधानमन्त्रीलाई उद्धृत गर्दै भने ।
उनका अनुसार बैठकपछि अहिले प्रधानमन्त्री ओली र सभापति देउवाबिच बालुवाटारमै भेटवार्ता चलिरहेको छ ।
