काठमाडौँ । सामाजिक सञ्जालमाथिको प्रतिबन्ध र भ्रष्टाचारको विरुद्ध भनिएको जेनजीको २०८२ भदौ २३ गते सोमबारको प्रदर्शन देशबाहिर पनि सञ्चालन भ्रएको छ ।
प्रदर्शनको क्रममा कैयौँ स्थानमा कर्फ्यु लागेको छ भने कतिपय स्थानमा प्रहरीले गोली चलाएको छ । कतै प्रदर्शनकारीले स्थानीय प्रशासनमाथि आक्रमण गरेका छन् ।
कास्की
जेनजीले पोखरामा सरकारी गाडी तोडफोड गरेका छन् । गण्डकी प्रदेशको मुख्यमन्त्री तथा मन्त्रिपरिषद् कार्यालय नजिकै मिलनचोकमा सोमबार दिउँसो बा २ झ ४२२ नम्बरको गाडी तोडफोड भएको हो ।
यहाँ प्रहरीको गोली लागेर एक जना घाइते भएका छन् । जिल्ला प्रशासन कार्यालय कास्कीले सहिदचोक क्षेत्रको चार किल्ला तोकेर निषेधाज्ञा जारी गरे पनि प्रदर्शन रोकिएको छैन ।
झापा
प्रधानमन्त्री केपी शर्मा ओलीको गृहनगर झापाको दमकमा जेनजी आन्दोलनका क्रममा प्रहरीको गोली लागेर घाइते भएका एक जनालाई थप उपचारका लागि विर्तामोडस्थित बिएन्डसी अस्पताल रिफर गरिएको छ । आन्दोलनकारीले दमक नगरपालिकाको कार्यालय कब्जामा लिन खोजेपछि प्रहरीले बल प्रयोग गरेको जनाएको छ । अस्पतालका सूचना अधिकारी डा. अनुपम घिमिरेका अनुसार देब्रे खुट्टामा गोली लागेर अस्पताल ल्याइएका २६ वर्षीय युवकको अवस्था गम्भीर भएपछि बिएण्डसी अस्पताल रिफर गरिएको हो ।
खोटाङ
जेनजीले खोटाङको दिक्तेलमा प्रदर्शन गरेका छन् । सोमबार मध्याह्न १२ बजे त्रिवेणीचौकबाट सुरु प्रदर्शन हाटडाँडा–त्रिवेणीचौक, बेसक्याम्प, रत्नपार्क हुँदै किरातचौकसम्म प्रदर्शन गरेका हुन् । प्रदर्शनमा विद्यालयका बालबालिका, शिक्षक लगायतको पनि सहभागिता थियो ।
जनकपुर
जनकपुरधाममा टायर बालेर जेनजी पुस्ताले प्रर्दशन गरेको छ । उनीहरूले ॅसरकार मुर्दावाद, गृहमन्त्री राजिनामा दे, जेनजी हाय/हाय, अरू सबै बाई बाई’ लगायतको नाराबाजी गरेका थिए । इन्ड करप्सन, आइएम विथ जेनजी मुभमेन्ट, स्टोप क्रप्सन, युथ युनाइटेड फ्युचर ब्राइट’ लगायतका प्लेकार्ड बोकेका थिए ।
चितवन
जेनजीको प्रदर्शनले भरतपुरमा स्थिति तनावपूर्ण बनेको छ । प्रर्दशनकारीले भरतपुर महानगरपालिका कार्यालयमा ढुङ्गामुढा गर्न थालेपछि प्रहरीले अश्रुग्याँस प्रहार गरेर स्थिति नियन्त्रणमा लिने प्रयास गरेको छ । जेनजीसम्बद्ध एक समूहले सोमबार बिहान एक घण्टा प्रदर्शन गरेका थिए ।
दाङ
जेनजी समूहले दाङका विभिन्न ठाउँमा प्रदर्शन गरेका छन् । घोराही, तुलसीपुरलगायत मुख्य मुख्य सहरमा युवाहरू भेला भएर नाराबाजी गरेका छन् । राष्टिय झन्डा र प्लेकार्ड बोकेका युवाले बजार परिक्रमा गरी जिल्ला प्रशासन कार्यालयको गेट अगाडिसमेत प्रदर्शन गरेका थिए ।
सुनसरी
सुनसरीको इटहरीमा बिहान ११ बजेदेखि प्रदर्शनमा उत्रिएका जेनजी र प्रहरीबिच दिउँसो झडप भएको छ । इटहरी उपमनपा कार्यालय अगाडि भएको प्रदर्शन उग्र बन्न थालेपछि स्थिति नियन्त्रणमा लिन प्रहरीले हवाई फायर र अश्रुग्याँस प्रहार गरेको थियो । झडपमा प्रदर्शनकारी र प्रहरीतर्फ केही घाइते भएका छन् । सिडिओ धर्मेन्द्रकुमार मिश्रले अर्को सूचना जारी नभएसम्मका लागि इटहरीचोक आसपास क्षेत्रमा लागु हुने गरी कर्फ्यु लगाएको जानकारी दिए ।
मोरङ
कोशी प्रदेशको राजधानी मोरङको विराटनगर जेनजी सडकमा उत्रिएका छन् । सरकारको भ्रष्टाचार विरुद्ध आक्रोश र सामाजिक सञ्जाल बन्दीकरणको विरोध गर्दै उनीहरूले प्रदर्शन गरे ।
रुपन्देही
जेनजीले बुटवलमा प्रदर्शन गरेका छन् । बिहान ९ बजे राजमार्ग चौराहाबाट सुरु भई बुटवल बहुमुखी क्याम्पसमा पुगेर प्रदर्शन समापन भएको थियो । प्रदर्शनमा ४ सयभन्दा बढीको सहभागिता रहेको थियो । यता प्रदर्शन उग्र बन्दै गएपछि जिल्ला प्रशासन कार्यालयले बुटवल–भैरहवा क्षेत्रमा शान्ति सुरक्षा कायम राख्न सोमबार दिउँसो ४ बजेदेखि राति १० बजेसम्म कर्फ्यु आदेश जारी गरेको छ ।
नवलपरासी (पूर्व)
कावासोतीमा जेनजी प्रदर्शनमा उत्रिएका छन् । कावासोतीको मध्यविन्दु, कुमारवर्ती र लुम्बिनी कलेजमा अध्ययनरत विद्यार्थी कावासोतीस्थित महेन्द्र राजमार्गमा प्रदर्शनमा उत्रिएका थिए ।
