काठमाडौँ । भ्रष्टाचार र सामाजिक सञ्जालमाथिको रोकको विरुद्ध भनिएको जेनजी आन्दोलन नियन्त्रणबाहिर गएको छ ।
‘नोप बेबी’ समेतको सहभागितामा २०८२ भदौ २३ गते सोमबार काठमाडौँमा आयोजित प्रदर्शन नियन्त्रणबाहिर पुगेको हो ।
प्रारम्भिक जानकारीअनुसार काठमाडौँमा सिभिल अस्पतालमा दुई जना र ट्रमासेन्टरमा एक जना जेनजी युवाको गोली लागेर उपचारको क्रममा निधन भएको छ भने हालसम्म ८० जनाजति प्रहरी र प्रदर्शनकारी घाइते भएका छन् । घाइतेहरूको अवस्था गम्भीर रहेको बताइएको छ ।
कर्फ्यु
जिल्ला प्रशासन कार्यालय काठमाडौँ प्रदर्शनकारीको उग्र अवस्था देखेपछि नयाँबानेश्वर वरपर कर्फ्यु लगाएको थियो । कर्फ्यु क्षेत्रभित्र बिजुली बजारदेखि तीनकुनेसम्म र मध्यबानेश्वरको रत्नराज्य माध्यमिक विद्यालयदेखि शङ्खमुलसम्मको क्षेत्र समावेश गरिएको छ ।
पछि प्रशासनले सिंहदरबार, शीतलनिवास, बालुवाटार क्षेत्रसमेतमा कर्फ्यु बढाएको जानकारी दिएको छ ।
कर्फ्यु लागेको सेनामा सशस्त्र प्रहरीसँगै सेना परिचालन गरिएको छ ।
दुई पत्रकार घाइते
समाचार सङ्कलनको क्रममा कान्तिपुर टेलिभिजनका भिडियो पत्रकार श्याम श्रेष्ठ घाइते भएका छन् । उनको सिभिल अस्पतालमा उपचार भइरहेको छ ।
त्यस्तै नयाँ पत्रिकाका दीपेन्द्र ढङ्गानालाई पनि रबरको गोली लागेको छ । त्यस्तै नेपाल प्रेसका उमेश कार्कीलाई पनि सामान्य चोट लागेको छ ।
‘हिंसात्मक गतिविधिमा सामेल हाम्रा होइनन्’
सोमबार दिउँसो आन्दोलनको व्यवस्थापनमा सहभागी जेनजीका प्रदीप ज्ञवालीले यो आन्दोलनमा विध्वंस र हिंसात्मक गतिविधि गर्नेहरू आफ्ना प्रतिनिधि नरहेको बताएका छन्।
‘विध्वंस वा हिंसात्मक गतिविधिमा संलग्न व्यक्ति हाम्रो हिस्सा होइनन्’ उनले आन्दोलनले आफूहरू सुरुदेखि नै शान्तिपूर्ण प्रदर्शनको पक्षमा रहेको दाबी गरे ।
‘हामीले सुरुदेखि नै यो प्रदर्शन शान्तिपूर्ण गर्ने भनेर भनिरहेका थियौँ । यसमा कुनै आधिकारिक आयोजक, नेतृत्व नभएको र आवाज मात्रै उठाउन भेला हुने भनेका थियौँ’ उनले थपे– ‘घुसपैठ हुन सक्ने अनुमान हामीले गरेका थियौँ । घुसपैठ भएपछि फर्किन आह्वान गऱ्यौँ ।’
यो समाचार तयार पार्दासम्म प्रदर्शनकारी घर फर्किएका छैनन् ।
संसद् भवनभित्रै प्रवेश
प्रदर्शनकारीले निषेधित क्षेत्र तोडेर संसद् भवनमा प्रवेश गरेका थिए । करिब सय जना प्रदर्शनकारीलाई संसद् भवनभित्रको प्रहरीले बाहिर निकालेको थियो । त्यस क्रममा केही प्र्रहरी घाइते भएका थिए ।
प्रदर्शनका कारणले राज्यसभाको आजको बैठक सूचना टाँस गरेर स्थगित भएको छ भने विभिन्न संसदीय समितिका बैठक पनि स्थगित भएको छ । त्यस क्रममा गृहमन्त्री रमेश लेखकसमेत बैठक छोडेर बाहिरिएको जानकारी प्राप्त भएको छ ।
काठमाडौँबाहिर पनि प्रदर्शन
प्रदर्शन काठमाडौँबाहिर पनि चलिरहेको छ ।
वीरगञ्ज, जनकपुर, पोखरा, नेपालगञ्ज, डडेलधुरा, बुटवल, धनगढी, धरान, भरतपुर, हेटौँडालगायत देशका विभिन्न भागमा उनीहरूको प्रदर्शन चलिरहेको छ । प्रदर्शनकारी धरान उपमहानगरपालिकाको कार्यालयमा प्रवेश गरेका थिए ।
झापाको दमकमा भएको प्रदर्शनमा एक जना जेनजी घाइते भएका छन् ।
