–प्रेमनारायण गैरे

नेतृत्वले जे गर्छ सधैं सबै राम्रो मात्रै गर्छ भन्ने बुझाइ गलत हो । राम्रो निर्णयलाई आत्मसात गरेर कार्यान्वयनमा लाग्नुपर्छ । गलतलाई गलत भन्न सक्नुपर्छ र सच्याउन लगाउनु पर्छ । नेकपामा जिल्ला नेतृत्व चयन गर्दा बिचार र विधिको मतलव नगरी मनोमानी गर्न खोजियो हामीले यो गलत छ । विधि बनाएर मात्र नेतृत्व चयन गरौँ भन्यौँ पार्टीले बिधि बनायो र हामीले भने अनुसार मौजुदा कमिटीको नेतृत्वबाट नै नेतृत्व घोषणा गयौँ बाताबरण सहज बन्यो ।

आम छलफल र बिचारको टुंगो नगरी २ नेताले घोषणा गरेर गरिएको एकता दीगो हुन सक्दैन भनेका थियौँ आखिर २ वर्ष पुग्दा नपुग्दै नेकपा विघटन भयो । नेकपा विघटन पछि एमाले पुरानो कमिटी २०७५ जेठ २ को अवस्थामा फर्कनु पर्थ्यो तर बिधान विपरित हजारौँको संख्यामा आयोजक कमिटी घोषणा गरियो अर्कोतर्फ माधव नेपालहरूले समान्तर कमिटी बनाए ।

हामीले आयोजक कमिटी र समानन्तर कमिटी दुबै पार्टी बिधान बिपरित भएकोले हामी कुनैपनी कमिटीका सदस्य होइनौँ । एकता पूर्व एमालेको २०७५ जेठ २को जिल्ला कमिटी उपसचिव हो । पार्टीले आयोजक कमिटी विघटन गरेर २०७५ जेठ २ का कमिटी र जिम्मेवारीमा फर्कनु पर्छ भन्यौँ । कतिपय मान्छेहरूले बगेको खोला फर्कदैन भन्दै हाम्रो विरुद्धमा उत्रिए ।

अब पाउँछस उपसचिव भने, तर अन्ततः पार्टी हामीले भने बमोजिम नै २०७५ जेठ २ मा फर्कियो। पार्टी लिगमा आयो । यसले पार्टीलाई ठूलो दूर्घटना हुनबाट जोगायो, हामीले पनि पूर्ववत जिम्मेवारी पायौँ । अनि उत्कृष्ट कार्य सम्पादन पनि गर्यौँ । यसले एमालेलाई ठूलो दूर्घटना हुनबाट पनि जोगायो । हामीले बिचार र बिधिको बहस गर्न डराएको भए पार्टी ठूलो दूर्घटनामा पर्न पनि सक्थ्यो । पार्टीमा तर्क र बहस गर्नेहरूलाई सधै बिरोधी मात्रै देख्ने होइन । सवल, सक्षम र बलियो पार्टी निर्माणका लागि निरन्तर बहस जरुरी हुन्छ भन्ने बुझ्नुपर्छ ।

अहिले पूर्व राष्ट्रपति बिद्या भण्डारीको सदस्यता बारे पार्टी केन्द्रीय कमिटीले गरेको निर्णय यतिबेला ठूलो बहसको बिषय बनेको छ र यो निकै पेचिलो बन्दै गएको छ । राजनीतिमा सक्रिय हुन्छु भनेर घोषणा गरेपछि बिद्या भण्डारीको सदस्यता नवीकरण रोक्ने निर्णय गर्नु राम्रो होइन भन्ने नै लागेको छ । हाम्रो संविधान र पार्टीको विधानले पनि यसो गर्न दिदैन र बिद्यालाई गरिने अपमानले एमाले बलियो बन्नै सक्दैन ।

करिब ७६ वर्षको इतिहास बोकेको एमाले जस्तो संवैधानिक विशाल पार्टीलाई थप बलियो बनाउन हल्ला र मौखिक कानुनले होइन व्यबस्थित विधि र विधानबाट चलाउनु पर्छ । पार्टीले हतारमा गरेको यो निर्णय सच्याउनु पर्छ र एमाले पूर्व उपाध्यक्ष समेत रहेकी कमरेड बिद्या भण्डारीको सदस्यतालाई निरन्तरता दिनुपर्छ ।

(लेखक– नेकपा गठन हुनुपुर्व अर्घाखाँची जिल्ला कमिटी उप–सचिव पछि नेकपा एमालेको लुम्विनी प्रदेश कमिटी सदस्य थिए । गैरे अर्घाखाँची जिल्लाको नवौँ जिल्ला अधिवेशनमा उपाध्यक्षको उमेद्वार वने पश्चात हाल जिम्मेवारी बिहिन छन् ।)