काठमाडौँ । नेकपा (एमाले) को दोस्रो विधान महाधिवेशन ललितपुरको गोदावरीमा आज २०८२ भदौ २० गतेदेखि प्रारम्भ हुँदैछ ।
महाधिवेशनको उद्घाटन पार्टी अध्यक्ष एवम् प्रधानमन्त्री केपी शर्मा ओलीले गर्ने कार्यक्रम छ ।
पार्टीका प्रचार विभाग प्रमुख राजेन्द्र गौतमका अनुसार महाधिवेशनमा ‘निर्णायक राष्ट्रिय शक्ति निर्माण हाम्रो सङ्कल्प, समृद्ध नेपाल, सुखी नेपाली राष्ट्रिय गन्तव्य’ नाराका साथ सम्पन्न हुने महाधिवेशनमा पार्टी अध्यक्ष ओलीले राजनीतिक प्रतिवेदन, उपाध्यक्ष विष्णुप्रसाद पौडेलले विधान संशोधनसम्बन्धी प्रस्ताव र महासचिव पोखरेलले सङ्गठनात्मक प्रतिवेदन प्रस्तुत गर्नेछन् ।
यसैगरी केन्द्रीय अनुशासन आयोगका अध्यक्ष केशव बडाल, लेखा आयोगका अध्यक्ष डा पुष्प कँडेल, केन्द्रीय निर्वाचन आयोगका अध्यक्ष डा विजय सुब्बा र केन्द्रीय सल्लाहकार परिषद्का अध्यक्ष अमृतकुमार बोहोराले आआफ्ना आयोगका प्रतिवेदन प्रस्तुत गर्नेछन् । प्रस्तुत प्रतिवेदनमा समूहगत छलफल हुनेछ ।
भदौ १९ गते केन्द्रीय सचिवालय बैठकमा फरक मत दर्ता गराएका स्थायी कमिटी सदस्य कर्ण थापाको पनि आज प्रस्तुति हुनेछ ।
महाधिवेशनमा दुई हजार २६ जना प्रतिनिधि र तीन सय १५ जना आयोजक सहभागी हुने बताइएको छ । यसअघि २०७८ सालमा विधान महाधिवेशन भएको थियो ।
कम्युनिस्ट पार्टीमा जसको नीति, उसको नेतृत्व हुने प्रचलन छ । सोहीअनुसार महाविधेशनमा नै दस्तावेज र नेतृत्व पारित गर्ने प्रचलन छ तर विधान महाधिवेशन अलग्गै गर्ने परम्पराले नीति र नेतृत्व फरक फरक हुने सम्भावना हुने पर्यवेक्षकहरू बताउँछन् । यो प्रचलन कम्युनिस्ट पार्टीको साङ्गठनिक परम्परा विरुद्ध रहेको तर्क उनीहरू गर्दछन् ।
