चितवन । चितवन मेडिकल कलेजमा उपचाररत एक बिरामीका आफन्तले बिरामीको मृत्यु भएको हल्ला पछि अस्पतालमा तोडफोड गरेका छन् ।
डाक्टरको लापरवाहीका कारण बिरामीको मृत्यु भएको भन्ने हल्ला चलेपछि आक्रोशित आफन्तले अस्पतालमा ढुंगा प्रहार गरेका थिए । उनीहरुले ढुंगा प्रहार गर्दा सघन उपचारकक्षको बाहिरको सिसा फुटेको अस्पतालले जनाएको छ ।
अस्पताल प्रशासनका अनुसार भरतपुर महानगरपालिका–२२ पदमपोखरीका १७ वर्षीय युवक आशिष सुनारको एपेन्डीसाइडको शल्यक्रियापछि उपचार भइरहेको छ । कलेजका अध्यक्ष प्रा डा हरिशचन्द्र न्यौपानेका अनुसार ती युवकको जटिल प्रकृतिको एपेण्डिक्स भएको हो ।
हाल सघन उपचारकक्षमा उपचार भइरहे पनि बुझ्दै नबुझी मृत्यु भएको भनेर आफन्तले अस्पतालमा तोडफोड गरेको डा न्यौपानेले बताउनुभयो ।
तोडफोड गरेको आरोपमा प्रहरीले तीन जनालाई पक्राउ गरी सामान्य सोधपुछ पछि छोडेको जिल्ला प्रहरी कार्यालय चितवनले जनाएको छ ।
