काठमाडौँ । राष्ट्रिय जनमोर्चाकी केन्द्रीय उपाध्यक्ष, प्रवक्ता तथा प्रतिनिधि सभाकी सांसद दुर्गा पौडेलले बजेटमा एमसिसीको प्रवेश अव्यावहारिक बताउँदै त्यसलाई तत्कालै फिर्ता लिन र त्यसबारे सरकारको धारणा माग गर्नुभएको छ । आज २०७७ जेष्ठ २८ गते संसद बैठकमा मन्तव्य राख्दै उहाँले यस्तो अभिव्यक्ति दिनुभएको हो ।
आज संसद सुरु भएलगत्तै प्रधानमन्त्री केपी शर्मा ओलीले ‘विनियोजन बजेट–२०७७’ मा उठेका विषयउपर मन्तव्य दिएलगत्तै बजेटमा खर्च कटौटीको प्रस्ताव राख्दै राजमो सांसद पौडेलले भन्नुभयो– ‘बजेटमा एमसिसी प्रवेश गराउनु अव्यावहारिक भयो ।’ ‘एमसिसी छुट्टै विषय हो, त्यसबारे बेग्लै प्रस्ताव आउला । त्यसबारे सार्वभौम संसदले निर्णय गर्ला’ सांसद पौडेलले प्रश्न गर्नुभयो– ‘तर अहिले नै बजेटमा एमससी किन समेटियो ?’ उहाँले ठोकुवा गर्नुभयो– ‘बजेटमा एमसिसीको प्रवेश अव्यावहारिक छ, गलत छ र त्यसलाई सरकारले तुरुन्त फिर्ता लिनुपर्दछ ।’ सांसद पौडेलले त्यसबारे सरकारको धारणासमेत माग गर्नुभयो ।
आजै ऋण तथा जनमानत चौबिसौँ संशोधन विधेयक–२०७७ माथि पनि राजमो सांसद दुर्गा पौडेलले आफ्नो धारणा राख्नुभएको थियो । ‘सरकारसित चालु खर्च धान्न सक्नेगरी आयश्रोत छैन’ उहाँले अगाडि भन्नुभयो– यस्तो अवस्थामा पनि ठुलो आकारको ऋण किन उठाउनुप¥यो ?’ सरकारले राजस्वबाट आठ खर्ब उठाउन खोजेको, तर सामान्य खर्च नै नौ अरबभन्दा बढी भएको बताउँदै उहाँले सामान्य खर्चका लागि समेत ऋण उठाउनुपर्ने गम्भीर स्थितितर्फ सरकारको ध्यानाकषर्ण गराउनुभयो ।
यस प्रकारको अवस्थामा आन्तरिक ऋण कसरी कम गर्ने भन्नेतर्फ सरकारको ध्यान जानुपर्ने बताउँदै उहाँले सांसद विकास कोष र सङ्घीय संरचनाबापत्को खर्च घटाउनतिर जोड दिनुपर्ने माग राख्नुभयो । ‘सांसद विकास कोषमा अर्बौं खर्च हुन्छ, सात वटा प्रदेशको सङ्घीय संरचनाका लागि ठुलो रकम खर्च हुन्छ’ सांसद पौडेलले भन्नुभयो– ‘यसका लागि हामीले कहिलेसम्म ऋण लिइरहने ?’ उहाँले अहिलेको कोरोना सङ्कटबाट जुध्नका लागि यी खर्च कटौटी गर्दै ऋणको आकार कम गराउन सरकारलाई आग्रह गर्नुभयो ।
