धनगढी । सेती प्रादेशिक अस्पतालले शुक्रबार ६ जना कोरोनाका बिरामीलाई डिस्चार्ज गरेको छ । तर, उनीहरु निको भएर डिस्चार्ज भएका भने हाृेइनन् ।
११ वर्षीया बालिकासहित बालिकाका बुवा र अन्य ४ संक्रमित अस्पतालले डिस्चार्ज गरेपछि धनगढीमा अलपत्र परेका छन् । अस्पतालको आइसोलेसनबाट डिस्चार्ज गरीएकोमा सम्बन्धित जिल्लासम्म पुगाउने व्यवस्था नभएपछि उनीहरु धनगढीमा अलपत्र परेका हुन् ।
अस्पतालको आइसोलेसनमा उपचाररत अछामको मेल्लेख गाउँपालिकाका ३२ वर्षीय पुरुष र ११ वर्षीय बालिका, बैतडीको शिवनाथ गाउँपालिका–१ का २० र २७ वर्षीय पुरुष तथा सोही गाउँपालिका वडा नम्वर २ का २० र २२ वर्षीय पुरुषलाई डिस्चार्ज गरिएको थियो ।
अस्पतालले डिस्चार्ज गरेपछि अस्पताल प्रांगणमा बसेका उनीहरुलाई भने प्रहरीले घर जान दबाब दिएको पीडितले बताएका छन् । यद्यपी घर कसरी जाने उनीहरुसँग विकल्प भने छैन ।
‘११ वर्षीय छोरी र मलाई पनि अस्पतालले घर जान भनेको छ,’ अछामका ३२ वर्षीय संक्रमित पुरुषले स्थानीइय सञ्चारकर्मीसँग भने, ‘गाउँपालिकालाई गाडीका लागि समन्वय गर्न भनिएको छ । मसँग कसैको नम्वर पनि छैन । मैले कस्लाई समन्वय गर्ने ?’
६ जना संक्रमितलाई कोरोना नजितेपनि स्वास्थ्य मन्त्रालयले जारी गरेको निर्देशिका अनुसार उनीहरुलाई डिस्चार्ज गरिएको सेती प्रादेशिक अस्पतालले जनाएको छ । यसअघि संक्रमितको लगातार दुई पटक नेगेटिभ रिपोर्ट आएपछि अस्पतालबाट डिस्चार्ज गर्ने व्यवस्था रहेकोमा स्वास्थ्य मन्त्रालयले नयाँ निर्देशिका जारी गरेपछि उनीहरुलाई डिस्चार्ज गरिएको हो ।
लक्षण नदेखिएको र स्वास्थ्य समस्या नभएका संक्रमितलाई १४ दिन आइसोलेसनमा राखेर डिस्चार्ज गर्न पाइने निर्देशिका पारित भएको थियो ।
नमूना संकलन कार्य स्थगित
यता, सुदूरपश्चिममा कोरोना परीक्षणका लागि क्षमता भन्दा धेरै नमूना संकलन भएको भन्दै शंकास्पद मानिसबाट नमूना संकलन कार्य स्थगित गरिएको छ । धनगढीस्थित एक मात्रै प्रयोगशाला रहेको प्रदेशको प्रयोगशालाको क्षमता भन्दा बढी नमूना आए पछि केही दिनका लागि नमूना संकलन नगर्न निर्देशन प्रयोगशालाले जनाएको छ ।
सेती प्रादेशिक अस्पतालमा रहेको प्रयोगशालामा औसत दिनमा २५० जनाको मात्रै परीक्षण गर्न सकिन्छ । अहिले पीसीआर परीक्षणका लागि एक हजार बढी नमूना प्रयोगशालामा रहेको र लामो समय राख्यो भने नमूना बिग्रने भन्दै संकलन कार्य स्थगित गरिएको हो ।
सुदूरपश्चिमको सामाजिक विकास मन्त्रालयले नै नमूना संकलन स्थगित गर्न निर्देशन दिएको बताइएको छ ।
