प्रज्ञा–प्रतिष्ठानको सङ्गोष्ठी समापन

शनिबार, जेठ १७, २०८२ मा प्रकाशित

काठमाडौँ । नेपाल प्रज्ञा–प्रतिष्ठानको सामाजिकशास्त्र विभागद्वारा आयोजित दुईदिने सङ्गोष्ठी समापन भएको छ ।

संस्कृति, पर्यटन तथा नागरिक उड्डयनमन्त्री बद्रिप्रसाद पाण्डेको उद्घाटनसँगै हिजो सुरु भएको सो कार्यक्रम दोस्रो दिन २०८२ जेठ १७ गते शनिबार समापन भएको हो ।

विभागकी प्रमुख डा कौशिला रिसालको अध्यक्षतामा सुरु भएको सो कार्यक्रमको सञ्चालन विश्वेश्वर कट्टेलले गर्नुभएको थियो ।

पहिलो सत्र

प्राडा त्रिरत्न मानन्धरको सत्राध्यक्षतामा सुरु भएको पहिलो सेसनमा प्राडा दीपबहादुर अधिकारीले ‘स्वास्थ्यविज्ञानको समाजशास्त्रीय विश्लेषण’, डा. हिमलाल श्रेष्ठले ‘पर्यावरणको वैज्ञानिक विश्लेषण : विधि र चुनौतीहरू’, डा लक्ष्मी थापामगरले ‘असमानताबाट वैचारिक रूपान्तरणतर्फ : सामाजिक विभेदले पारेको प्रभाव’ र प्रकाश थापामगरले ‘उत्पीडनका सामाजिक प्रभावहरू’ विषयक कार्यपत्र प्रस्तुत गर्नुभएको थियो ।

कार्यपत्रमाथि जिज्ञासा राख्दै फ्लोरबाट सोमबहादुर धिमाल, निनाम लोवात्ती कुलुङ, अशोककुमार पाठक, जीवनारायण खनाल, केबी घले र कर्ण दयालले छलफलमा भाग लिनुभएको थियो ।

चारै जना कार्यपत्र प्रस्तोताले सो जिज्ञासाबारे आआफ्ना धारणा राख्नुभएको थियो ।

सङ्क्षिप्त मन्तव्य राख्दै सत्राध्यक्ष प्राडा मानन्धरले सो सत्रको समापन गर्नुभएको थियो ।

दोस्रो सत्र

प्राडा सोमप्रसाद खतिवडाको सत्राध्यक्षतामा दोस्रो सत्र सुरु भएको थियो ।

सो सेसनमा डा. पासाङ शेर्पाको ‘हिमाली क्षेत्रमा प्रचलित आम्ची (सोवारिग्पा) उपचार पद्धति’, धनबहादुर रेश्मीको ‘सार्वजनिक विद्यालयमा हुने सामाजिक भेदभावको प्रभाव : जनजाति र दलित विद्यार्थी विरुद्धको प्रतीकात्मक हिंसा’, माधव घिमिरेको ‘परमाणु कारणवादको सामाजिक उपयोगिता’ र भैरवराज रेग्मीको ‘नेपाली किसानका समस्याको समाजशास्त्रीय अध्ययन’ विषयक कार्यपत्र प्रस्तुत भएका थिए ।

कार्यपत्रमा प्रा.डा. त्रिरत्न मानन्धर, ईश्वरी शर्मा, सोमप्रसाद धिमाल, हिमाल गिरी, भीमा खजुम, अशोककुमार पाठक र कर्ण दलालले जिज्ञासा राख्नुभएको थियो ।

कार्यपत्र प्रस्तोताले सो जिज्ञासाबारे आआफ्नो विचार राख्नुभएपछि सत्राध्यक्ष खतिवडाले दोस्रो सत्रको पनि समापन गर्नुभएको थियो ।

प्यानल छलफल

सङ्गोष्ठीको यो सत्रमा ‘राष्ट्रिय चिन्तन’ विषयमाथि केन्द्रित रहेर प्यानल छलफल भएको थियो ।

सो छलफलमा प्राडा विद्यानाथ कोइराला, डा आनन्द पौडेल र डा ठाकुर भट्टले विश्वेश्वर कट्टेलका विभिन्न चरणका प्रश्नको जवाफ दिँदै धारणा राख्नुभएको थियो ।

समापन

समापन कार्यक्रम डा विष्णुकुमार सिँजालीको सञ्चालनमा अघि बढेको थियो ।

डा लक्ष्मी थापामगर, प्राडा शम्भुप्रसाद खतिवडा र केशव नेपालले सङ्क्षिप्तमा सङ्गोष्ठीको अनुभव राख्नुभएको सो कार्यक्रममा प्रतिष्ठानका सदस्यसचिव डा धनप्रसाद सुवेदीले पनि मन्तव्य राख्नुभएको थियो ।

अतिथि, कार्यपत्र प्रस्तोतालगायतलाई सदस्यसचिव सुवेदीको हातबाट प्रशंसापत्र वितरण गरिएपछि कार्यक्रमको समापन सभाध्यक्ष डा कौशिला रिसालले गर्नुभएको थियो ।

प्रज्ञाको वार्षिक सङ्गोष्ठी सुरु : संस्कृतिमन्त्री पाण्डेद्वारा उद्घाटन, पहिलो कार्यपत्र प्रा.डा. गौतमको

सङ्गोष्ठीका केही फोटा