नयाँ दिल्ली (भारत) । मूल प्रवाह अखिल भारत नेपाली एकता समाजका पूर्वकेन्द्रीय सदस्य कृष्ण कुँवर सडक दुर्घटनामा परि गम्भीर घाइते हुनु भएको छ ।
दुर्घटनामा परेका बुवाको दाहसंस्कार गरेर फर्कने क्रममा दुर्घटना हुँदा छोराको पनि मृत्यु भएको छ भने कुँवरसहित अन्य छोराबुहारी घाइते भएको हुन् ।
अछामको साँफेबगर नगरपालिका– बैजनाथ निवासी झंकारनाथ योगीको बैँग्लोरमा भएको दुर्घटनामा मृत्यु भएपछि उनको दाहसंस्कार गरी फर्कनेक्रममा गाडी दुर्घटनामा परेको थियो ।
दुर्घटनामा झंकरका छोरा ३५ वर्षीय हर्षनाथ योगीको ज्यान गएको छ ।
झंकरकै अर्का छोरा पुष्कर नाथ योगी तथा दिनेश योगी र बुहारी निशा योगी पनि दुर्घटनामा घाइते भएका छन् ।
महाराष्ट्रको करमला–कुर्डुवाडी सडक बरकुटे नजिकै उक्त घटना भएको मूल प्रवाहले जनाएको छ ।
मूल प्रवाह अखिल भारत नेपाली एकता समाजका अध्यक्ष ठाकुर खनालले मृतक हर्षदनाथ योगीप्रति हार्दिक श्रद्धाञ्जली अर्पण गर्दै घाइते नेता कृष्ण कुँवरसहित सबैको शिघ्र स्वास्थ लाभको कामना गर्नुभएको छ ।
बैंगलोरमा रेलबाट खसेर मृत्यु भएका झंकर योगीको अन्तिम संस्कार गरेर गुजरात फर्किने क्रममा सो घटना भएको स्थानीय सञ्चारमाध्यमले जनाएका छन् । कुर्डुवाडीबाट आउँदै गर्दा वरकुटे नजिकै कार सडकको छेउमा रहेको इमिलीको रूखमा ठोक्किएको थियो । योगीका छोराको घटनास्थलमै मृत्यु भएको थियो ।
घाइतेहरू मध्ये दुईजनाको करमलास्थित उपजिल्ला अस्पतालमा उपचार भइरहेको छ भने गम्भीर घाइते कृष्ण कुँवरसहित अन्य एकजनाको निजी अस्पतालमा उपचार गरिएको छ।
साफेबगर–८ चण्डीका कृष्ण बहादुर कुँवर हाल गुजरातको वापीमा कार्यरत हुनुहुन्छ ।
