हैदरावाद (भारत) । भारतको हैदरावादमा मूल प्रवाह अखिल भारत नेपाली एकता समाजको मध्य दक्षिण क्षेत्रीय समितिले मे दिवस मनाएको छ ।
केन्द्रीय सदस्य तथा क्षेत्रीय समितिका अध्यक्ष रामप्रसाद पौडेलको प्रमुख आतिथ्यमा मे १, २०२५ का दिन सभाको आयोजना गर्दै एक सय छत्तिसौँ मे दिवस मनाइएको हो ।
कार्यक्रममा मन्तव्य राख्दै पौडेलले मजदुर दिवसको इतिहास र मजदुरको वर्तमान अवस्थाबारे चर्चा गर्नुभएको थियो ।
ॅमूल प्रवाहले मात्र भारतमा रहेका आम श्रमजीवी नेपालीको हकहित र अधिकारका लागि निरन्तर काम गर्दै आइरहेको छ’ उहाँले भन्नुभयो– ॅमजदुर वर्गको मुक्ति प्राप्ति गर्न स्वयम् मजदुर वर्ग नै जुर्मुराएर उठ्नुपर्छ ।’
सभालाई सम्बोधन गर्दै अर्का अतिथि केन्द्रींय प्रतिनिधि तथा दक्षिण नगर समितिका अध्यक्ष रतनसिंह विश्वककर्माले शारीरिक श्रमजीवी मात्रै नभएर बौद्धिक श्रमिकको अवस्था पनि दयनीय रहेको बताउनुभयो ।
कार्यक्रममा मन्तव्य राख्ने अन्य वक्तामा केन्द्रीय सदस्य कृष्णबहादुर थापा, केन्द्रीय सदस्य तथा क्षेत्रीय महिला विभागकी संयोजक पुष्पा पौडेल, केन्द्रीय सांस्कृतिक विभागकी केन्द्रीय सदस्य तथा क्षेत्रीय संयोजक माया थापा, दक्षिण हैदरावादका भूपाल ठाडा, मध्य हैदरावादका कुमार थापा र उत्तर हैदराबादका सूर्यबहादुर थापाले मन्तब्य राख्नुभएको थियो ।
कार्यक्रमको सञ्चालन क्षेत्रीय सचिव तिलक रानाले, अध्यक्षता कोषाध्यक्ष घनश्याम शर्माले र स्वागत मन्तव्य क्षेत्रीय सदस्य गङ्गा कडायतले राख्नुभयो ।
