काठमाडौँ । दैलेखको दुल्लु नगरपालिका –७ मा निर्माण गरिएको क्वारेन्टिनमा मृत्यु भएका युवकमा कोरोना संक्रमण पुष्टि भएको छ । कर्णाली प्रदेशका सामाजिक विकास मन्त्रालयका स्वास्थ्य महाशाखा प्रमुख डा. लक्ष्मी नारायण तिवारीले युवकको कोरोना भाइरस परीक्षण गर्दा रिपोर्ट पोजेटिभ आएको जानकारी दिनुभयो ।
तीन दिनअघि स्वाब परीक्षणको लागि कर्णाली स्वास्थ्य विज्ञान प्रतिष्ठान जुम्ला पठाइएका दुल्लु नगरपालिका–११ का ३५ वर्षीय ती युवकको शनिबार बिहान क्वारेन्टिनमा मृत्यु भएको हो ।
भारतबाट फर्किएका उनी क्वारेन्टिनमा बसेको १० दिन भएको थियो । योसँगै नेपालमा कोरोना भाइरस संक्रमणले मृत्यु हुनेको संख्या सात पुगेको छ । यसअघि सिन्धुपाल्चोक, गुल्मी, अर्घाखाँची, ललितपुर, बारा र बाँकेमा पनि १–१ जनाको मृत्यु भएको थियो ।
कोरोनाका कारण अहिलेसम्म नेपालमा मृत्यु भएका ७ जनामध्ये ६ जनाको रिपार्ट मृत्यु भएपछि मात्रै आएको छ । एक जनाको मात्रै कोरोना पुष्टि भएर उपचार गर्दागर्दै क्रममा ज्यान गएको थियो । यसले नेपालमा कोरोना परीक्षणको रिपोर्ट ढिला आउने र उपचारै नपाएर नागरिकले ज्यान गुमाउनुपर्ने अवस्था देखाएको छ ।
