धनबिर पुन  गाजिपुर, युपी (भारत) । भारतको उत्तर प्रदेश गाजीपुरमा स्थानीय प्रशासनले २१ दिनदेखि रोकेर राखेका नेपाली श्रमिकलाई मूल प्रवाह अखिल भारत नेपाली एकता समाजले स्वदेश फर्काएको छ ।

गुजरातको मैसाणाबाट स्वदेश हिँडेका ४० जना नेपालीलाई गाजिपुर प्रशासनले रोकेर राखेको थियो । उनीहरुलाई मूल प्रवाहका केन्द्रीय सचिव ठाकुर खनाल र केन्द्रीय सदस्य भीम सिंह विष्टको पहल तथा नेपाली दूतावाससँगको कोअर्डिनेशनमा गाजिपुर क्वारेन्टिनबाट निकाली स्वदेश पठाइएको हो ।

उनीहरु २१ दिनदेखि उत्तर प्रदेशको गाजिपुरमा थुनिएर बसेका थिए । उनीहरु मे ८ का दिन गुजरात मैसाणा जिल्ला कलेक्टरद्वारा उत्तर प्रदेशको बहराइचसम्मको पास बनाई श्रमिक उद्धार रेलमार्फत गाजिपुर पुगेका थिए । गाजिपुर पुगेका उनीहरुलाई प्रशासनले रोकेर राखेको थियो ।

जब उनीहरु गाजिपुरमा फसेको जानकारी मूल प्रवाहका केन्द्रीय सदस्य भिमसिंह विष्टले थाहा पाउनुभयो, उनीहरुलाई छुटाउन निकै कसरत गर्नुभएको थियो । त्यस्तै, मूल प्रवाहको केन्द्रीय कार्यालयबाट विभिन्न निकाय तथा पत्रकारहरुलाई समेत सो विषयमा जानकारी गराइएको थियो ।

विष्टका अनुसार गाजिपुर प्रशासनले दैलेख जिल्ला प्रशासन कार्यालयले सम्पर्क गरेमा छाडि दिने बताएता पनि त्यसका लागि दैलेख जिल्ला प्रशासन सम्पर्क गर्न तयार नभएको गुनासो गर्नु भयो ।

केन्द्रीय सचिव ठाकुर खनालले नेपाली दूतावासमा सो समस्या बारे जानकारी गराई उनीहरुलाई छुटाई भारत–नेपाल सीमानासम्म पुग्ने वातावरण मिलाउन आग्रह गर्नुभएको थियो । खनालको सो आग्रहलाई मध्य नजर गर्दै नेपाली दूतावासद्वारा गाजिपुर प्रशासनलाई सम्पर्क गरिएको थियो ।

यसरी गाजिपुरमा फसेकाहरुमा दैलेख भैरवी गाउँपालिका निवासी याम बहादुर थापा, मोतिराम थापा, हरि बहादुर थापा, इन्द्र बहादुर थापा, तिलक बहादुर थापा, ओम प्रशेश थापा, रेशम बहादुर थापा, चन्द्र बहादुर सार्की, राजेश थापा, दिल बहादुर थापा, पुरान बि।क।, बिनोद कामी, चब रमेश थापा, दुर्गे बिक, ढाका बहादुर बिके, रेशम बहादुर क्षेत्री रहेका छन् ।

त्यस्तै दैलेखकै दुल्लु नगरपलिकाका खगेन्द्र प्रसाद शर्मा, कलाम बहादुर शाही, चेतन बहादुर शाही, झलक भण्डारी, नविन प्राइवार, अम्हार बहादुर नेपाली रहेका छन् ।

त्यस्तै महाबु गाउँपालिकाका पूरान जायसी, सागर शाही, दिनेश शर्मा, खगेन्द्र हितान, पार्लाड प्रसाद जैशी, हरि कामी, बिनोद बुडा छन् ।

यसैगरी गुराँस गाउँपालिकाका पारस पुन मगर र बर्दिया मधुवन गाउँपालिकाका शिवराज सुनार, कंचनपुर बेलडाडीका दिपक गिरी, राजेन्द्र गिरी, सन्तोष रोकाया, प्रकाश रोकाया, नरेन्द्र रोकाया, टेक बहादु कठायत, अजय चौधरी, सारण राना र विरेन्द्र नगर नगरपालिका सुर्खेतका हिकमत बुढा गरि ४० जनालाई गत २१ दिनदेखि उत्तर प्रदेशको गाजिपुरमा रोकेर राखिएको थियो ।
यो पनिः

मूल प्रवाहको पहलमा भारतका यी शहरबाट घर फर्कंदैछन् नेपालीहरु