चिदम्बरम (भारत) । भारतको चिदम्बरममा मूल प्रवाह अखिल भारत नेपाली एकता समाजको आयोजनमा सङ्घीयता विरुद्ध ऐक्बद्धता सभा सम्पन्न भएको छ ।
राष्ट्रिय जनमोर्चाले २०८१ चैत २४ देखि ३० गतेसम्म सञ्चालन गर्न थालेको सङ्घीयता विरुद्ध राजधानीकेन्द्रित आन्दोलनप्रति ऐक्यबद्धता जनाउँदै सो कार्यक्रम सम्पन्न भएको हो ।
कार्यक्रममा मन्तव्य राख्दै प्रमुख अथिति केन्द्रीय सदस्य बालाकृष्ण गायकले देशको अर्थतन्त्रले धान्नै नसक्ने र राष्ट्रिय अखण्डता नै विखण्डन गराउने सङ्घीयता नेपालको आवश्यकता नभएको धारणा राख्नुभयो ।
उहाँले भन्नुभयो– ‘त्यसैले राष्ट्रिय जनमोर्चाले चलाउने सङ्घीयता विरुद्ध राजधानीकेन्द्रित आन्दोलनप्रति मूल प्रवाहको ऐक्यबद्धता रहेको छ ।’
सभालाई सम्बोधन गर्दै क्षेत्रीय समितिका सदस्य हेमबहादुर गन्धर्वले सङ्घीयताले देशमा सङ्कट मात्र निम्त्याउने बताउँदै भारत प्रवासमा हुने यस्ता सभाले त्यसलाई फाल्न मदत पुग्ने बताउनुभयो ।
त्यस्तै, नगर महिला विभागकी खेमकुमारी जिसीले सभामा शुभकामना मन्तव्य राख्नुभएको थियो ।
गोकुलबहादुर गायकको उद्घोषक तथा सूर्यमान गिरीको अध्यक्षतामा अघि बढेको उक्त कार्यक्रममा उपस्थित जनसमुदायलाई प्रेमप्रसाद पराजुली र रक्तिम सांस्कृतिक अभियानका कलाकार स्वागत गर्नुभएको थियो ।
