काठमाडौँ । देशभरका शिक्षकहरू फेरि सडक आन्दोलनमा उत्रिएका छन्। शिक्षकहरूले माइतीघर मण्डलाबाट नाराबाजी गर्दै नयाँ बानेश्वर पुगेका छन्।
विगतका सबै सहमति कार्यान्वयन गराउन नेपाल शिक्षक महासङ्घको नेतृत्वमा शिक्षण पेसासँग सम्बन्धित संघ, संगठनहरू सडकमा ओर्लिएका हुन् ।
२०८० सालमा सरकारसँग भएको सहमति कार्यान्वयन गराउन तथा शिक्षा ऐन जारी गर्न दबाब दिने उद्देश्यले शिक्षकहरू आन्दोलनमा उत्रिएको महासंघले जनाएको छ ।
शिक्षक महासङ्घले सरकारसँग शिक्षा ऐन यथाशीघ्र जारी गर्नुपर्ने, हालै प्रमाणीकरण भएको निवृत्तिभरण सम्बन्धी अध्यादेश खारेज गर्नुपर्ने लगायतका माग राख्दै चरणबद्ध आन्दोलनको घोषणा गरिसकेको छ।
फागुन १७ गतेसम्म पहिलो चरणको आन्दोलनअन्तर्गत स्थानीय तह, जिल्ला, प्रदेश र केन्द्र गरेर आन्दोलनका विभिन्न कार्यक्रम गरेको थियो।
अस्थायी प्रकृतिका शिक्षकहरूको स्थायित्वका लागि नयाँ ऐनमा कार्यरतहरूलाई विशेष प्राथमिकतासहित आन्तरिक परीक्षाको प्रबन्ध हुनुपर्ने, विद्यालय कर्मचारीको विषय हरेक विद्यालयमा कर्मचारीको दरबन्दी सिर्जना गरी कार्यरत कर्मचारीलाई प्राथमिकतामा राखी स्थायित्वको प्रक्रियामा लैजानुपर्ने, बालकक्षा शिक्षकको सवालमा विद्यालय शिक्षाको आधार रहेको प्रारम्भिक बाल शिक्षालाई संरचना बाहिर राख्न नहुने,अस्थायी अवधि गणना तथा निवृत्तिभरणबारे विश्व विद्यालयमा पेन्सन प्रयोजनका लागि सबै अस्थायी अवधि गणना हुने व्यवस्था छ।
त्यसैले विद्यालय शिक्षामा पनि यो प्रबन्ध लागू गरिनुपर्नेलगायत बढुवा, ग्रेड तथा तलब मिलानलगायतको माग राखि शिक्षकहरू आन्दोलनमा उत्रिएका हुन्।
यसअघि पनि शिक्षकहरू आन्दोलनमा उत्रिएका थिए। तर, सरकारले माग सम्बोधन गर्ने सहमति गरेपछि उनीहरूको आन्दोलन रोकिएको थियो। माग पुरा नभएको भन्दै शिक्षकहरू अहिले फेरि काठमाडौँको सडकमा ओर्लिएका छन्।
