काठमाडौँ । आगामी चैत ५ गते हुन गइरहेको स्ववियु निर्वाचनका लागि अखिल (छैठौं )ले देशका विभिन्न जिल्लामा सङ्गठन दर्ता गरेको छ ।
अखिल (छैठौं) का अध्यक्ष सुवास जिसीका अनुसार आज फागुन १९ गते सोमबार देशैभरि सङ्गठन दर्ता गरिएको हो ।
काठमाडौँको त्रिभुवन विश्वविद्यालय, त्रिचन्द्र क्याम्पस, आरआर क्याम्पस, शङ्करदेव क्याम्पस, अमृत क्याम्पस, ताहाचल क्याम्पस, पद्मकन्या क्याम्पसमा सङ्गठन दर्ता भएको छ ।
त्यस्तै, ललितपुर पाटन क्याम्पसमा पनि सङ्गठन दर्ता भएको छ । नेपाल ल, बानेश्वर क्याम्पसलगायतका अन्य क्याम्पसमा पनि संगठन दर्ता प्रक्रियामा रहेको छ ।
त्यसैगरी मकवानपुर, चितवन, कास्की, बागलुङ, प्युठान, अर्घाखाँची, गुल्मी, पाल्पा, रुपन्देही, कपिलवस्तु, दाङ, बाँके, नेपालगञ्ज, सुर्खेत, मोरङ, पाँचथर, झापा र डोटीका विभिन्न क्याम्पसमा सङ्गठन दर्ता भएको छ ।
बुटवल बहुमुखी क्याम्पसमा पूर्व स्ववियु सदस्य सागरजङ्ग एमसीको नेतृत्वमा, सिद्धार्थ गौतम बुद्ध क्याम्पसमा कल्पना क्षेत्री, लुम्बिनी वाणिज्य क्याम्पसमा अविनाश खड्काको नेतृत्वमा दर्ता गरिएको छ ।
त्यस्तै, सहिद नारायण पोख्रेल रामापुर क्याम्पस र हरैया क्याम्पसमा भोलि बिहान दर्ता गरिने युनियनका महासचिव तथा लुम्बिनी इन्चार्ज पुरन पोख्रेलले जानकारी दिनुभयो ।
लुम्बिनी, बागमती, गण्डकी, कोशी, कर्णाली र सुदूरपश्चिमसहित सबै प्रदेशका आङ्गिक र सम्बन्धनप्राप्त क्याम्पसमा अखिल (छैठौं) स्वतन्त्र विद्यार्थी युनियनको निर्वाचनका लागि तयार रहेको उहाँले जानकारी दिनुभयो ।
उहाँका अनुसार केही दिनभित्रै अखिल (छैठौं) ले आफ्ना उम्मेदवार सार्वजनिक गर्नेछ ।
