वापी (भारत) । भारतको गुजराज वापीमा मूल प्रवाह अखिल भारत नेपाली एकता समाजले सङ्घीयता विरुद्ध काठमाडौँकेन्द्रित आन्दोलनको प्रचारात्मक तथा ऐक्यबद्धता सभा सम्पन्न गरेको छ ।
पश्चिम भारत क्षेत्रीय समितिको आयोजनामा फेब्रुअरी २३, २०२५ का दिन सो कार्यक्रम सम्पन्न भएको हो ।
कार्यक्रममा केन्द्रीय अध्यक्ष ठाकुर खनालको प्रमुख आतिथ्य रहेको थियो ।
प्रमुख अतिथिको आसनबाट सम्बोधन गर्दै अध्यक्ष खनालले सङ्घीयता नेपाली जनताको माग र चाहना नभएर विदेशीले बोकाइदिएको भारी भएकाले गत लामो समयदेखि आफूहरूले विरोध गर्दै आएको बताउनुभयो ।
अहिले अमेरिकी राष्ट्रपतिले ट्रम्पले सङ्घीयता नेपालको आन्तरिक मामिला भएको बताउँदै त्यसको कार्यान्वयनका लागि आर्थिक सहयोग नगर्ने घोषणालाई उहाँले अहिलेको सन्दर्भ जोड्नुभयो ।
उहाँले भन्नुभयो– ‘राजनीतिक दलले नेपाली जनतालाई भ्रमित बनाएर आफ्ना कार्यकर्ता पाल्न ल्याएको सङ्घीयता अब धेरै दिन टिक्नेवाला छैन ।’
सङ्घीयता खारेजीको लागि सम्पूर्ण देशभक्त नेपाली जनता एक भई सङ्घर्षमा उत्रिनुपर्ने वर्तमान समयको आवश्यकता भएको उहाँको थप भनाइ थियो ।
सभामा केन्द्रीय सचिव वेदबहादुर कार्की, केन्द्रीय सदस्य गोविन्दबहादुर थापा, रमकला काउचा, केन्द्रीय महिला विभागकी बिना काउचा, केन्द्रीय जनजाति विभागकी प्रविन काउचा, केन्द्रीय समता विभागकी शेरबहादुर विक, केन्द्रीय सांस्कृतिक विभागकी हरि काउचालगायतका अतिथिले मन्तव्य राख्नुभएको थियो ।
त्यस्तै, क्षेत्रीय महिला विभागकी शान्ति तिरुवा, सुरत नगर अध्यक्ष किशोर ताम्राकार, वापी पूर्व नगर अध्यक्ष गनबहादुर राना, वापी पश्चिम नगर अध्यक्ष देवेन्द्र रावल, दमन नगरका शेरसिंह आउजी, सिलवासा नगर समितिका मानबहादुर थापा, पश्चिम भारत सांस्कृतिक विभागकी सीता थापाले पनि मन्तव्य राख्नुभएको थियो ।
क्षेत्रीय समितिका उपाध्यक्ष बाबुराम दहितको अध्यक्षता तथा क्षेत्रीय सचिव कृष्ण कुँवरको सञ्चालनबाट अगाडि बढेको सो कार्यक्रममा निखिल रावत र रक्तिमका कलाकारले स्वागत गर्नुभएको थियो ।
