नयाँ दिल्ली (भारत) ।
मूल प्रवाह अखिल भारत नेपाली एकता समाजले भारतको उडिसा राज्यस्थित कलिंगा इन्सट्यूट अफ इन्डस्ट्रियल टेक्नोलोजी (किट) को होस्टेलबाट लखेटिएका नेपाली विद्यार्थीलाई सम्मानका साथ फर्कने वातावरण बनाउन सरकारसँग आग्रह गरेको छ ।
विद्यार्थीमाथि दुर्व्यवहार गर्ने कलेज प्रशासनलाई कडा कारबाही गर्न माग गर्दै मूल प्रवाहले नेपाली विद्यार्थीको सुरक्षामा विशेष जोड दिएको छ ।
अध्यक्ष ठाकुर खनालले मंगलबार एक विज्ञप्ति प्रकाशित गरी प्रकृति लम्सालको आत्माहत्या वा हत्या हो, सो को निष्पक्ष छानबिनको माग गर्नुभएको छ ।
भारतमा नेपाली मजदुर वा विद्यार्थीमाथिसमेत बारम्बार दुर्व्यवहार हुने गरेको भन्दै विज्ञप्तिमा भारत वा विश्वभरी नै नेपालीहरू अपमानित हुनुपर्नाको कारण सरकारको दब्बु प्रवृत्ति भएको जनाइएको छ ।
यस्तो छ विज्ञप्ति
भारतको उडिसा राज्यस्थित कलिंगा इन्सट्यूट अफ इन्डस्ट्रियल टेक्नोलोजी (किट) मा अध्ययनरत रुपन्देही घर भएकी २० वर्षीया प्रकृति लम्सालको गत आइतबार साँझ विश्वविद्यालयको होस्टलमा मृत भेटिएसँगै उत्पन्न घट्नाप्रति हाम्रो संगठनको गम्भीर ध्यानाकर्षण भएको छ ।
सर्वप्रथम मृतक प्रकृति लम्सालको निधनप्रति भावपूर्ण श्रद्धान्जली प्रकट गर्दै शोकसन्तप्त परिवारजनप्रति हार्दिक समवेदना व्यक्त गर्दछौं ।
प्रकृति लम्सालको आत्माहत्या वा हत्या त्यसको निष्पक्ष छानबिनका लागि नेपाली विद्यार्थीहरुले सो शैक्षिक संस्थानलाई दबाव दिँदै आन्दोलन गर्दै आएका छन् । सो घटनालाई लिएर विद्यार्थीहरुले गर्दैआएको निश्पक्ष छानविनको आन्दोलनप्रति पनि ऐक्यवद्धता प्रकट गर्नुका साथै आन्दोलनमा सरिक विद्यार्थीहरुलाई धन्यवाद ज्ञापन गर्दछौं । त्यसका साथै उडीशा राज्य सरकार र त्यसका सम्बन्धित निकायसमक्ष प्रकृति लम्सालको आत्माहत्या वा हत्या हो, निश्पक्ष छानविनको माग गर्दछौं ।
अध्ययनरत नेपाली विद्यार्थीहरुलाई संस्थान प्रशासनले छात्रावासबाट निकालिएको र अभद्र व्यवहार गर्ने गरेको सुचना पनि विभिन्न सामाजिक सञ्जालहरुबाट प्राप्त भइरहेका छन् । यसरी अमानवीय व्यवहार गर्ने व्यक्तिहरु र संस्थान प्रशासनलाई कडा कानुनी कारबाहीको लागि पनि हाम्रो संगठन जोड दिन्छ । साथै सो शैक्षिक संस्थानमा रहेका नेपाली विद्यार्थीहरुको ससम्मान रुपमा शैक्षिक संस्थानको छात्रावासमा नै सुरक्षा सुनिश्चित गर्दै नेपाली विद्यार्थीहरुको कक्षा सञ्चालनका लागि आवश्यक व्यवस्था मिलाउन सम्बन्धि पक्षहरु समक्ष अनुरोध गर्दछौं ।
देशको शिक्षा प्रणाली व्यवहारिक र रोजगार मुलक नहुनुका कारण नै लाखौं नेपाली विद्यार्थीहरु शिक्षार्जनका लागि भारत लगायत विश्वका विभिन्न देशहरुमा जानुपर्ने वाध्यता छ । यो सिंगो नेपाली समाजको समस्या हो । अहिले पनि लाखौं विद्यार्थीहरु कोरिया, युरोप, चीन, बंगलादेश, इजरायल, जापान, क्यानडा, रसिया, अमेरिका, अष्ट्रेलिया लगायतका विभिन्न देशहरुमा अध्ययनरत छन् । विदेशमा नेपाली विद्यार्थीहरुले अनेकौं अभद्र व्यवहार, अपमान, दुस्ख, कष्ट र घटनाहरुको शिकार हुनु परिरहेको छ । त्यसको एक मात्र उदाहरण हो प्रकृती लमसालको निधन । यस्तै प्रकारका कैयौं समस्याहरुसँग जुध्नुपर्ने वाध्यता नेपाली विद्यार्थीहरुको लागि नियती नै बनेको छ । तर सरकार र त्यसका सरोकारवाल पक्षहरु ट्वीटरमा एउटा स्टाटस ट्वीट गरेर आफ्नो जिम्मेवारी पुरा भएको आत्मासन्तुष्टि लिँदैछन् ।
त्यस्तै शिक्षा आर्जनको बहानामा रोजगारीका लागि अमेरिका लगायत विभिन्न देशहरुमा नेपाली विद्यार्थीहरु छरिएका छन् । हालै मात्र अमेरिकामा रहेका करिब १३ सय नेपालीहरु अवैधानिक इमिग्रेशनको कारण स्वदेश डिपोट हुने बताइएको छ । उनीहरुलाई नेपाल सरकारले नै सम्मानपूर्वक स्वदेश ल्याउनु पर्दछ । साथै स्वदेशमा नै उच्चस्तरिय, व्यवहारिक, रोजगारमुलक र राष्ट्रप्रति उत्तरदायी शिक्षा नीति लागू गर्न सरकार समक्ष माग गर्दछौं ।
धन्यवाद ।
ठाकुर खनाल
अध्यक्ष
