काडमाडौँ । राष्ट्रिय जनमोर्चाका महासचिव मनोज भट्टले नेपालमा पहाडबाट तराई टुक्राउनकालागि सङ्घीयता ल्याएको दावी गर्नुभएको छ ।
२०८१ माघ २६ गते शनिबार काठमाडौँ तारकेश्वरको गोल्ढुङ्गामा आयोजित सभालाई सम्बोधन गर्दै उहाँले यस्तो अभिव्यक्ति दिनुभएको हो ।
राजमो काठमाडौँद्वारा सङ्घीयता खारेजीका लागि काठमाडौँकेन्द्रित आन्दोलनको तयारीस्वरुप आयोजित सभालाई महासचिव भट्टले सम्बोधन गर्दै हुनुहुन्थ्यो ।
हामीले इतिहासमा सन् १८१४ देखि १८१६ सम्म तराईको रक्षाका लागि युद्ध लडेका थियौँ उहाँले भन्नुभयो– ‘अहिले फेरि तराई टुक्राउनका लागि सङ्घीयता ल्याएको छ ।’
उहाँले नेपालबाट तराई टुक्राउन भारतले पहिले देखि नै प्रयास गरेको, त्यसक्रममा वेदान्द झाको नेतृत्वमा तराई काङ्ग्रेस गठन भएको स्मरण गराउनुभयो ।
उहाँले भन्नुभयो– ‘अहिले देशमा सङ्घीयता भित्राएको भारतले हो र त्यसको उद्देश्य पनि पहिले जस्तै नेपालको भूमिबाट तराईलाई टुक्राउनु हो ।’
उहाँले काङ्ग्रेस सभापति शेरबहादुर देउवा र माओवादी केन्द्रका अध्यक्ष प्रचण्डले सङ्घीयताको जननी भारत भएको स्पष्ट पार्नुभयो ।
त्यसक्रममा उहाँले २०६३ माघको २२ दिने मधेसवादी आन्दोलन भारतीय दूताबासमा आएर टुङ्गिएको तथ्यतर्फ ध्यान दिन आग्रह गर्नुभयो ।
कार्यक्रममा अखिल नेपाल कानुन व्यवसायी सङ्घ (अन्ला) का अध्यक्ष अधिवक्ता पदम रोका र अखिल नेपाल जनजाति सम्मेलनका अध्यक्ष निमबहादुर बुढाथोकीले पनि सम्बोधन गर्नुभएको थियो ।
सभाको सञ्चालन अखिल नेपाल महिला सङ्घका कोषाध्क्ष रितु केसी र अध्यक्षता राजमो तारकेश्वरका ईश्वरी फुँयालले गर्नुभएको थियो ।
