काठमाडौँ । राष्ट्रिय जनमोर्चाका अध्यक्ष तथा प्रतिनिधिसभाका सांसद चित्रबहादुर केसीले वैचारिक रूपमा बलियो युवकले मात्रै समाज बदल्न सक्ने बताउनुभएको छ ।
२०८१ माघ १९ गते शनिबार अखिल नेपाल युवक सङ्घको बागमती प्रदेश भेलालाई सम्बोधन गर्दै उहाँले सो अभिव्यक्ति दिनुभएको हो ।
राजमो केन्द्रीय कार्यालयको सभाकक्षमा आयोजित भेलामा मन्तव्य राख्दै उहाँले भन्नुभयो– ॅदार्शनिक, राजनीतिक, वैचारिक र चारित्रिक रूपमा बलियो युवकले मात्रै समाज बदल्न सक्दछ ।’
समाज बदल्नका लागि सर्वप्रथम आफै बदलिनुपर्नेमा उहाँको जोड थियो । त्यसका लागि अध्ययन महत्त्वपूर्ण पाटो भएको उहाँको किटानी थियो ।
समाजमा व्यक्तिवादी सोच बढ्दै गएको अवस्थामा समाज बदल्ने विषय अत्यन्त गाह्रो भएको उहाँको भनाइ थियो ।
‘समाजमा मै खाऊँ, मैलाऊँ, मरुन् सब दुर्बलहरू भन्ने भावना विकास भइरहेकोमा समाज बदल्ने कुरा गाह्रो छ’ अध्यक्ष केसीले भन्नुभयो– ‘अहिले पनि समाजमा अल्पसङ्ख्यक शोषकले बहुसङ्ख्यक जनताको शोषण गरिरहेकाले यो समाज बदल्नैपर्दछ ।’
उहाँले जनतामाथिका सबै प्रकारको शोषणको अन्त्यका लागि नयाँ जनवादी क्रान्ति हुनुपर्ने बताउनुभयो ।
नयाँ जनवादी क्रान्ति सम्पन्न गर्नका लागि युवकहरूले मार्क्सवाद–लेनिनवाद र माओ विचारधाराको अध्ययन गर्नुपर्ने बताउनुभयो ।
फरक प्रसङ्गमा उहाँले सङ्घीयता देशका लागि अभिशाप भएकाले तथा यसले मुलुकलाई टाट पल्टाइरहेको बताउँदै युवकसित सङ्घीयता खारेजीका लागि काठमाडौँकेन्द्रित आन्दोलनलाई सफल पार्नका लागि आग्र्रह गर्नुभयो ।
