चिदम्बरम (भारत) । भारतको चिदम्बरममा मूल प्रवाह अखिल भारत नेपाली एकता समाजको पन्ध्रौँ नगर सम्मेलन सम्पन्न भएको छ ।
केन्द्रीय कोषाध्यक्ष मदन शर्माको प्रमुख आतिथ्यमा डिसेम्बर २२, २०२४ का दिन सो सम्मेलन सम्पन्न भएको हो ।
सम्मेलनको मैनबत्ती बालेर उद्घाटन गर्नुभएपछि मन्तव्य राख्दै प्रमुख अथिति शर्माले एकता समाज निश्चित उद्देश्य र विचार लिएर स्थापना भएको सङ्गठन बताउनुभयो ।
‘एकता समाज स्थापना हुनुअघि भारतमा सोझा नेपालीलाई भ्रममा पारेर आर्थिक लाभ लिने खालका विभिन्न समूह थिए’ उहाँले भन्नुभयो– ‘तर एउटा भिजन बोकेको सङ्गठनले मात्र भारतस्थित श्रमजीवी नेपालीको हकहितको लागि काम गर्न सक्दथ्यो र त्यो नै हाम्रो सङ्गठन हो ।’
सम्मेलनलाई केन्द्रीय सदस्य भगवती कुँवर, दक्षिण भारत क्षेत्रीय समितिका सदस्य डिल्लीप्रसाद शर्मा, प्रवासी नेपाली सङ्घका विष्णुप्रसाद शर्मा, नेपाली जनसम्पर्क समितिका खेमनाथ शर्मा र गभर्मेन्ट इमप्लोई एसोसिएसनका आर गान्धीलगायतका अथितिले शुभकामना दिनुभएको थियो ।
सो अवसरमा केन्द्रीय सदस्य बालाकृष्ण गायक, दक्षिण भारत क्षेत्रीय समितिका सदस्य नारायण शर्मा र हेमबहादुर गन्धर्वको आतिथ्य रहेको थियो ।
गोकुलबहादुर गायकको उद्घोषण तथा मोहराज शर्माको अध्यक्षतामा अघि बढेको उक्त सम्मेलनमा उपस्थित अथितिलाई खादा र ब्याच लगाएर सम्मान गरिएको थियो । सहिदप्रति एक मिनेट मौनधारण गरी अघि बढेको उक्त सम्मेलनमा उपस्थित जनसमुदायलाई शब्दद्वारा सूर्यमान गिरीले तथा रक्तिम सांस्कृतिक कलाकारले गीतद्वारा स्वागत गर्नुभएको थियो ।
अध्यक्षमा शर्मा
सम्मेलनले नारायण शर्मा अध्यक्ष रहनुभएको १७ सदस्यीय नगर समिति चयन गरेको छ ।
समितिमा उपाध्यक्ष देवेन्द्र आचार्य, सचिव सूर्यमान गिरी, सहसचिव मेघराज शर्मा र कोषाध्यक्ष हेमबहादुर गन्धर्व रहनुभएको छ ।
त्यस्तै, सदस्यमा मोहराज शर्मा, गोकुलबहादुर गायक, जीवन पराजुली, पदमबहादुर केसी, प्रेमप्रसाद पराजुली, चन्द्रबहादुर केसी, वैकल्पिक सदस्य बालाकृष्ण गायक, रुद्रप्रसाद शर्मा, रमाकान्त शर्मा तथा सल्लाहकारमा तोयनाथ शर्मा, दुर्गादेवी हमाल र जीवन शर्मा रहनुभएको छ ।
नवनिर्वाचित समितिलाई प्रमुख अतिथि शर्मा, केन्द्रीय सदस्य जनकराज पौडेल, चन्द्रकान्त शर्मा, क्षेत्रीय समितिका सदस्य गोविन्द शर्मा र रक्तिमका कलाकारले गीतद्वारा बधाई दिनुभएको थियो ।
रक्तिमका कलाकारबाट सांस्कृतिक कार्यक्रमपश्चात नवनिर्वाचित उपाध्यक्ष देवेन्द्र आचार्यले धन्यवाद मन्तव्य राख्नुभएको थियो ।
