मेघराज रिष्मेली, टोकियो ।
गल्कोट समाज कान्साईले “संसारभर छरिएर रहेका गल्कोटेलाई उठौँ, जुटौँ, हातेमालो गरौँ, संसारका गल्कोटे एकजुट होऔँ” मूल नाराका साथ प्रथम कान्साई प्रथम नेपाल फेस्टिभल आयोजना गर्दै छ ।
आगामी नेपाली नयाँ वर्ष २०८२ अर्थात् अङ्ग्रेजी वर्ष २०२५ जुन महिनाको १४ र १५ गते शनिबार र आइतबारको दिन पारेर कान्साईमा सो कार्यक्रम गर्न लालिएको हो ।
आयोजकका अनुसार नेपालको भेषभूषा, कला, साहित्य, संस्कार–संस्कृति, सभ्यतासहित प्राकृतिक, धार्मिक, पौराणिक तथा ऐतिहासिक महत्त्व झल्किने गरी नेपालको मौलिक रहनसहन तथा नेपाली जीवनशैलीलाई कलात्मक तरिकाले प्रस्तुत गर्ने गरी जापानी समुदाय तथा अन्तर्राष्ट्रिय जगतमा नेपाललाई चिनाउने, पर्यटन प्रबर्द्धनमा टेवा पुर्याउने उद्देश्य राखिएको छ ।
जापानको कान्साईमा पहिलोपटक ऐतिहासिक प्रथम नेपाल फेस्टिभल गर्ने निर्णय कार्यसमितिको प्रथम बैठकले निर्णय गरिसकेको र तदअनुरूप अगाडि बढेको संस्थाका अध्यक्ष नरबहादुर थापाले बताउनुभयो ।
जापान जस्तो व्यस्त देशमा कान्साईमा क्रियाशील सम्पूर्ण सङ्घसंस्था तथा जापानमा क्रियाशील सम्पूर्ण सङ्घसंस्था तथा सम्पूर्ण नेपाली समुदायलाई समेट्दै हुन गइरहेको दुई दिने फेस्टिभलमा नेपालका ख्यातिप्राप्त चर्चित विभिन्न संस्कृति तथा विधाका दर्जनौँ राष्ट्रिय कलाकारको साथमा गरिने र उक्त फेस्टिभलमा भएको आम्दानीबाट संसारभरिका गल्कोटेहरूले अपनत्व महसुस गर्न सक्ने गरी दीर्घकालीन योजनाअन्तर्गत अन्तर्राष्ट्रिय गल्कोट समाज बहुसांस्कृतिक, बहुउद्देशीय समाज घर निर्माण गर्ने (अन्तर्राष्ट्रिय मापदण्डअनुसार) तथा नेपाली समुदायमा भइपरी आउँदा एकजुट हुँदै अगाडि बढ्ने आयोजक संस्थाले बताएको छ ।
परदेशी समाज सेवाको गौरवपूर्ण इतिहास बोकेको गल्कोट समाजले जापानमा क्रियाशील नेपाली समुदायमा आर्थिक, नैतिक, भौतिक, सामाजिक सांस्कृतिक सद्भावको सहयोग अपेक्षासहित यो फेस्टिभलको आयोजना गर्न लागिएको आयोजकले जानकारी दिएको छ ।
फेस्टिभल जापानको ओसाका सहरमा अवस्थित ओसाका क्रियटिभ सेन्टरको प्राङ्गणमा हुने छ ।
