काठमाडौं । अमेरिकामा नेपालीले चलाएको कार दुर्घटना हुँदा दुई जना नेपालीको ज्यान गएको छ । एकजना घाइते भएका छन् भने चालक पक्राउ परेका छन् ।
३० वर्षीय विजय तामाङले चलाएको कार भर्जिनिया राज्यस्थित च्यान्टिलीनजिकै दुर्घटना भएको हो ।
दुर्घटनामा रुकुमपश्चिमको आठबीसकोट नगरपालिक-७ का सुरेश केसी र बर्दियाका विवेक सुवेदीको मृत्यु भएको छ भने काठमाडौँका मेहुल श्रेष्ठ घाइते भएका छन्। अस्पतालमा उपचाररत श्रेष्ठको अवस्था खतरामुक्त रहेको बताइएको छ।
स्थानीय सञ्चारमाध्यमका अनुसार दुर्घटना लाउडाउन काउन्टी पार्क वे र ताल सेडार पार्क वेनजिक भएको हो। ठक्कर दिने कार चालक पनि नेपाली नै हुन्।
चालक तामाङलाई पक्राउ गरी दुई जनाको हत्या अभियोगमा मुद्दा चलाउने तयारी भइरहेको छ। अहिले उनलाई लाउडाउन काउन्टी अडल्ट डिटेन्सन सेन्टरमा राखिएको छ।
चालक तामाङले अत्यधिक मादक पदार्थ पिएर कार चलाएकाले दुर्घटना भएको आशंका त्यहाँको प्रहरीले गरेको छ। कार अनियन्त्रित भई सडकबाहिर उछिट्टिँदै रूखमा ठोकिएको प्रत्यक्षदर्शीले बताएका छन्।
