रामप्रसाद पौडेल, हैदरावाद (भारत) ।
प्युठानका दुर्गबहादुर पुनको दुर्घटनामा परी भारतको हैदरावादमा निधन भएपछि मूल प्रवाह अखिल भारत नेपाली एकता समाजले दाहसंसकार गरेको छ ।
दुर्घटनामा परेका पुनको अक्टोबर २६, २०२४ का दिन हैदरावादस्थित गान्धी हस्पिटलमा उपचारको दौरानमा निधन भएको हो ।
प्युठान जिल्ला स्वर्गद्वारी नगरपालिका–६ सालबाङ निवासी बुबा चन्द्रबहादुर पुनमगर र आमा बनिदेवी पुनमगरको छोरा दुर्गबहादुर (दुर्गेस) हैदरावाद उप्पलको मार्वल पसलमा कार्यरत हुनुहुन्थ्यो । उहाँ यही अक्टोबर २० का दिन बेलुकी करिब ९/१० बजेतिर मोटरसाइकल दुर्घटनामा पर्नुभएको थियो ।
मूल प्रवाह अखिल भारत नेपाली एकता समाज अटोनगरका सचिव नुमलाल पुनमगरको पहलमा उनलाई पहिला सुप्रजा हस्पिटलमा भर्ना गरिएको थियो । पछि नगर अध्यक्ष वीरबहादुर विक र नगर सचिव भूपाल ठाडा रानामगरसमेतको पहलमा गान्धी अस्पताल रेफर गरिएको थियो ।
रक्तिम सांस्कृतिक विभागकी क्षेत्रीय संयोजक माया थापामगर, मध्यदक्षिण क्षेत्रीय सदस्य राजु दुलाल र बालनगर टोल समितिका सदस्य चन्द्रकला विकसमेतको पहलिमा मृतक दुर्गबहादुरको कवाडीगुडास्थित घाटमा अन्त्येष्टि गरिएको थियो ।
दाहसंस्कार स्थलमा मूल प्रवाहको दक्षिण हैदरावाद नगर समितिले श्रद्धाञ्जलीसभा सम्पन्न गरेको थियो ।
एक मिनेट मौनधारणपश्चात् अघि बढेको उक्त कार्यक्रममा मूल प्रवाहका केन्द्रीय सदस्य कृष्णबहादुर थापा, परिषद् सदस्य गङ्गा कडायत, क्षेत्रीय सदस्य गोमा रानामगर, दक्षिण हैदरावाद नगर समितिका अध्यक्ष वीरबहादुर विक, नगर सदस्य गिरबहादुर कार्की र कम्पनीका अरिहेन्टले शोकमन्तव्य राख्नुभएको थियो ।
कार्यक्रमको सञ्चालन दक्षिण हैदरावादका सचिव भूपाल ठाडा रानामगरले गर्नुभएको थियो ।
