नवलपुर । राष्ट्रिय जनमोर्चा नवलपुरले भारतद्वारा अतिक्रमित भूमि तुरुन्त फिर्ता लिन सरकारसित माग गरेको छ । यही वैशाख २६ गते भारतले नेपाली भूमि हुँदै चीनको मानसरोवरसम्म जाने सडकमार्गको उद्घाटन गरेको सन्दर्भमा राजमो नवलपुरले सो माग गरेको हो ।
राजमो नवलपुरका अध्यक्ष दीपक पाण्डेको हस्ताक्षरमा २०७७ वैशाख २९ गते जारी प्रेसवक्तव्यमा उक्त भूमिमा भारतीय सैनिक चेकपोस्ट कायम गरिएकाले त्यसलाई तत्कालै हटाउन माग गरिएको छ ।
वक्तव्यमा हालसम्मका नेपाली शासकवर्गको अयोग्यताकै कारण सीमा अतिक्रमण तीव्र भएको दावी पनि गरिएको छ । सत्तास्वार्थबाट माथि उठेर राष्ट्रिय एकता, भौगोलिक अखण्डता र स्वाभिमानलाई केन्द्रमा राखेर काम गर्न राजमो नवलपुरले आग्रह गरेको छ । त्यसका लागि सम्पूर्ण राजनीतिक दल, नागरिक समाज र आम जनता एक ढिक्का हुनुपर्ने आवश्यकतामा पनि जोड दिइएको छ ।
वक्तव्यमा लकडाउनका कारण भारतसित जोडिएको सिमानामा हजारौँ नेपालीहरू अलपत्र र बिचल्ली अवस्थामा रहेकोमा सरकारको ध्यानाकर्षण गराइएको छ । क्वारेन्टाइनमा बसेका नेपालीहरूले खाना, चर्पीजस्ता आधारभूत सेवा उपभोग गर्न नपाएको तथा स्थानीय प्रशासनले उनीहरूसित मानवीय व्यहारसमेत नगरिएकोमा चिन्ता व्यक्त गरिएको छ । राजमो नवलपुरले तत्काल उनीहरूको आधारभूत सुविधामाथि ध्यान दिँदै नेपाल ल्याउन आवश्यक पहल गर्न पनि आग्रह गरिएको छ ।
