पुष्कर भट्ट, महेन्द्रनगर ।
नेपाली भुमि लिपुलेकमा सडक बनाएर भारतले नेपालको सार्वभौमिकतामाथि हस्तक्षेप गरेको विरोधमा कञ्चनपुरमा पनि भारतीय प्रधानमन्त्री नरेन्द्र मोदीको पुत्ला दहन गरिएको छ । सोमबार कञ्चनपुरको भीमदत्तनगर, बेदकोट, शुक्लाफाँटा र कृष्णपुर नगरपालिकामा पुत्ला दहन गरिएको हो ।
कोणसभामा वक्ताहरुले भारतलाई अतिक्रमित भूमि फिर्ता गर्न चेतावनीसहित नेपाल सरकारलाई हस्तक्षेपविरुद्ध दृढतापूर्वक उभिन आग्रह गरेका थिए ।
वेदकोट नगरपालिकामा पुत्ला दहन पछि आयोजित कोणसभालाई सम्बोधन गर्दै अखिल (छैठौं) का महासचिव महेशराज जोशीले कोरोना भाइरसको महामारीको अवसर छोपेर भारतले नेपाली भूमिमा सडक सञ्चालन गरेको जोशीले बताउनुभयो । महासचिव जोशीले नेपाली भूमिमाथिको हस्तक्षेपविरुद्ध अब जनस्तरबाटै प्रतिकार गर्ने चेतावनी दिनुभयो ।
कोरोनाको महामारीलाई पनि वेवास्ता गर्दै जनता सडकमा उत्रिरहेको भन्दै महासचिव जोशीले नेपाल सरकारले तत्काल समस्यालाई अन्तर्राष्ट्रियकरण नगरे नेपाल सरकार सँगै भारतीय साम्राज्यवादलाई पनि हस्तक्षेप महंगो पर्ने बताउनुभयो ।
अखिल (छैठौं) का जिल्ला सचिव पुष्कर भट्टले सञ्चालन गरेको कार्यक्रममा नेकपा (मसाल) का जिल्ला प्रवक्ता लक्ष्मी बडु, राष्ट्रिय जनमोर्चाका जिल्ला सदस्य गोबिन्द बोहरा, बेदकोट नगर संयोजक कमल साहु, रक्तिम सास्कृतिक अभियानका जिल्ला अध्यक्ष ललित चन्द, अखिल नेपाल युवक संघका प्रदेश सदस्य भुपेन्द्र भण्डारी, राजमो नेता धर्मदेव पन्त, विद्यार्थी नेता कपिल नाथ लगायत नेता कार्यकर्ताहरुको सहभागिता रहेको थियो ।
यस्तै, शुक्लाफाँटा नगरपालिकामा आयोजित पुत्ला दहन कार्यक्रमलाई सम्बोधन गर्दै राजमो जिल्ला अध्यक्ष रामबहादुर कार्कीले १०/१२ वर्ष लगाएर भारतले नेपाली भूमिमा बाटो बनाउँदासमेत शासकहरु टुलुटुलु हेरिबसेको आरोप लगाउनुभयो ।
यसैगरी महेन्द्रगरमा आयोजित कार्यक्रमलाई राजमो जिल्ला सहसचिव लालबहादुर कुँवर र कृष्णपुर नगरपालिकामा आयोजित कार्यक्रमलाई जातीय समता समाजका महासचिव गोविन्द विकले सम्बोधन गर्नुभएको थियो ।
यो पनि पढ्नुहोस्ः
कैलालीका ठाउँ-ठाउँमा मोदीको पुत्ला दहन, प्रहरीसँग झडप
भारतीय प्रधानमन्त्री मोदीको पुत्ला दहन
