डोटी । भारतले नेपाली भूमि लिपुलेक हुँदै मानसरोवर जाने बाटो निर्माण गरेको विरोधमा भारतीय प्रधानमन्त्री नरेन्द्र मोदीको पुत्ला दहन गरिएको छ । राष्ट्रिय जनमोर्चा डोटीको आयोजनामा आइतबार मोदीको पुत्ला जलाएर विरोध प्रदर्शन गरिएको हो ।
पुत्ला दहन पछि बोल्दै राजमो डोटीका सचिव केशनाथ योगीले नेपाली भूमिमा सडक खनेर भारतीय साम्राज्यवादले नेपालको सार्वभौमिकता र भौगोलिक अखण्डतामा हस्तक्षेप गरेको बताउनुभयो । नेपाली शासकहरुको भारतप्रतिको दब्बु मानसिकताका कारण भारतले नेपाली भूमि मिच्दै लगेको योगीको आरोप थियो ।
लिपुलेकमाथिका भारतीय हस्तक्षेप विरुद्ध सरकार कडा रुपमा प्रस्तुत हुनुपर्ने बताउँदै योगीले लिपुलेक, कालापानी र लिम्पियाधुरा समेटिएको नक्सा तत्काल कायम गर्न तथा अतिक्रमित भूमिबारे सप्रमाण अन्तर्राष्ट्रियकरण गर्न माग गर्नुभयो । केआईसिंह गाउँपालिकामा भएको विरोध कार्यक्रमको सञ्चालन हरि भट्टराईले गर्नुभएको थियो ।
यस्तै, सोही विषयलाई लिएर राजमो डडेल्धुराले पनि विरोध प्रदर्शन गरेको छ । डडेल्धुराको भातकाँडामा आयोजित कोणसभामा अनेरास्ववियू (छैटौं) का जिल्ला अध्यक्ष टंक अवस्थीले सम्बोधन गर्दै भारतलाई नेपाली सार्वभौम भूमिमाथिको हस्तक्षेप बन्द गर्न चेतावनी दिनुभएको थियो ।
नेपाली भूमि लिपुलेकमा भारतले एकतर्फि रुपमा सडक सञ्चालन गरेको विरुद्धमा राजमोले विरोधलाई निरन्तरता दिने भएको छ । लकडाउनका कारण ठुलो समूहमा एकत्रित भएर विरोध प्रदर्शन गर्ने अवस्था नभएकोले विभिन्न गाउँहरुमा विरोध प्रदर्शनको आयोजना गरिएको राजमो केन्द्रीय सदस्य एवं सुदूरपश्चिम इन्चार्ज मनोज भट्टले जानकारी दिनुभयो ।
उहाँका अनुसार भोलि (सोमबार) कैलालीको अत्तरिया, धनगढी, टिकापुर, कञ्चनपुरको बेदकोट, बेलौरीलगायतका स्थानमा विरोध प्रदर्शन हुनेछ ।
भारतले हालै मानसरोवर यात्राको लिंक रोड उद्घाटन गरेर सञ्चालनमा ल्याएको छ । भारतीय बीआरओ (बोर्डर रोड अर्गनाइनेसन) ले निर्माण गरेको धार्चुलादेखि लिपुलेकसम्मको सडक भारतीय रक्षामन्त्री राजनाथ सिंहले शुक्रबार उद्घाटन गरेका थिए ।
भारतीय कदमको नेपालमा कडा विरोध भइरहेको छ भने सरकारले पनि त्यसविरुद्ध विज्ञप्तिमार्फत असन्तुष्टि जनाएको छ ।
