धनगढी । भारतले दार्चुलाको लिपुलेकमा सडक निर्माण गरेको विरोधमा कैलालीको विभिन्न ठाउँमा भारतीय प्रधानमन्त्री नरेन्द्र मोदीको पुत्ला दहन गरिएको छ । त्यस क्रममा प्रहरीसँग झडपसमेत भएको छ ।
सोमबार राष्ट्रिय जनमोर्चाले अत्तरिया, लम्कि, टिकापुरलगायतका स्थानमा गरेको पुत्ला दहनका क्रममा प्रहरीले पुत्ला खोस्न खोज्दा झडप भएको हो ।
अत्तरियामा राजमो नेता कार्यकर्ताहरुले पुत्ला लिएर जलाउन खोज्दा प्रहरीले खोसेको छ । त्यसक्रममा राजमो कार्यकर्ताहरुले भारतीय साम्राज्यवाद विरुद्ध चर्का नारावाजी गरेका थिए ।
त्यहाँ आयोजित कार्यक्रमलाई सम्बोधन गर्दै राजमो केन्द्रीय सदस्य एवं सुदूरपश्चिम इन्चार्ज नन्दराज भट्टले नेपालको एक इन्च भूमि पनि कसैले मिचे नेपाली जनतालाई सह्य नहुने बताउनुभयो । भारतले नेपाली भूमिमा जारि राखेका गतिविधि तत्काल रोक्न चेतावनी दिँदै उहाँले नेपाल सरकारलाई आफ्नो भूमिको रक्षा गर्न सकेकोप्रति आक्रोश पनि व्यक्त गर्नुभयो ।
अखिल (छैठौं) का केन्द्रीय सदस्य हेमराज भट्टको सञ्चालनमा सम्पन्न कोणसभामा अखिल नेपाल किसान महासंघका केन्द्रीय सदस्य हरिकृष्ण पाण्डेले पनि सम्बोधन गर्नुभएको थियो ।
यता, कैलालीकै लम्कि बजारमा पनि राजमोले भारतीय प्रधानमन्त्री मोदीको पुत्ला जलाउन खोज्दा प्रहरीले हस्तक्षेप गरेको छ । प्रहरी हस्तक्षेप पछि आयोजित कोणसभामा नेकपा (मसाल) का जिल्ला प्रवक्ता मिलन शाही र राजमो नगर सदस्य महानन्द कोइरालाले सम्बोधन गर्दै राष्ट्रियताको रक्षा गर्न नसक्ने सरकारले शान्तिपूर्ण कार्यक्रम गर्दा प्रहरी लगाएर हस्तक्षेप गरेको भन्दै सरकार विरुद्ध आक्रोश व्यक्त गर्नुभयो ।
यता, टिकापुरको मुनुवामा भने राजमोले मोदीको पुत्ला दहन गरेको छ । त्यहाँ आयोजित कार्यक्रमको सञ्चालन राष्ट्रिय जनमोर्चा कैलालीका अध्यक्ष दयाराम संज्यालले गर्नु भएको थियो भने सम्बोधन राजमो सुदूर पपश्चिम प्रदेश समिति सदस्य तिलक परियारले गर्नु भयको थियो । कार्यक्रममा राजमो कैलाली जिल्ला उपाध्यक्ष शिबराज रेग्मी, जानकि गाउँ कमिटि अध्यक्ष टेक राज न्यौपाने, टिकापुर नगर सहसचिब बिनोद केसी लगायत नेता कार्यकर्ताहरुको उपस्थिति रहेको थियो ।
आजै दिउँसो ४ बजे धनगढीस्थित एलएन चोकमा र ५ बजे राजपुरमा मोदीको पुत्ला जलाउने कार्यक्रम रहेको राजमो कैलालीले जनाएको छ । यस्तै, कञ्चनपुरका विभिन्न स्थानमा पनि विरोध प्रदर्शनको तयारी गरिएको छ ।
भारतले शुक्रबार नेपाली भूमि लिपुलेक हुँदै तिब्बतको मानसरोबर जाने बाटो सञ्चालनमा ल्याएको विरोधमा राजमोसहित विभिन्न पार्टी तथा संगठनहरुले त्यसको विरोध गर्दै आएका छन् भने सरकारले पनि भारतसँग असन्तुष्टि जनाएको छ ।
यो पनि पढ्नुहोस्ः भारतीय प्रधानमन्त्री मोदीको पुत्ला दहन
