नयाँ दिल्ली (भारत) । भारतको बेंगलोरमा हत्या गरिएकी नेपाली युवती महालक्ष्मी दासको मूल प्रवाह अखिल भारत नेपाली एकता समाजको पहलमा अन्त्येष्टि गरिएको छ ।
डडेल्धुराकी २९ वर्षीया महालक्ष्मीको शव बेंगलोरस्थित घरमा फ्रिजभित्र टुक्रा टुक्रा पारेको अवस्थामा शनिबार फेला परेको थियो ।
घटाबारे जानकारी पाउनासाथ मूल प्रवाहका केन्द्रीय सदस्य तथा बेंगलोर दक्षिण नगर समितिका अध्यक्ष नरेश कुमार बि क, कोषाध्यक्ष रमेशराम विक, नगर सदस्य रामराज पौडेललगायतको टिम घटनास्थल पुगेको थियो ।
डडेलधुराको अलिताल गाउँपालिका–४ लम्जुल्लीकी महालक्ष्मी भारतको तिरपुराका हेमन्त दाससँग विवाह गरी लामो समयदेखि बेंगलोरमा बस्दै आएकी थिइन् । उनका चार वर्षकी एक छोरी छन् । श्रीमानसँग झगडा भएपछि उनी ९ महिनादेखि मालेश्वर क्षेत्रमा अलग्गै बस्दै आएकी थिइन् । उनले श्रीमानविरुद्ध प्रहरीमा जोही समेत दिएकी थिइन् ।
मूल प्रवाह बेंगलोर दक्षिण नगर समितिको पहलपछि घर परिवारको रोहबरमा उनको बोरिङ हस्पिटमा पोस्टमार्टम गरी सबै सरकारी प्रक्रिया पूरा गरेपछि सेप्टेम्बर २२ का दिन लालबाघास्थित समशानघाटमा अन्तिम संस्कार गरिएको छ ।
३० टुक्रा, फ्रीजभित्र शव
उनको हत्यापछि शव ३० टुक्रा पारेर अवस्थामा फ्रीजभित्र भेटिएको थियो । शनिबार बेंगलोरको व्यालिकभल क्षेत्रस्थित फ्ल्याटको फ्रीजमा महालक्ष्मीको शवका अनेक टुक्रा भेटिएका हुन् ।
द इकोनोमिक टाइम्सका अनुसार उक्त फ्ल्याटबाट दुर्गन्ध फैलिन थालेपछि घरधनीले शनिबार दिउँसो प्रहरीलाई खबर गरेका थिए । शनिबार दिउँसो ती महिलाका घरधनीले परिवारलाई पनि झिकाएका थिए ।
घरधनीको फोनपछि महालक्ष्मीकी आमा र बहिनी पुगे । उनीहरू पुग्दा महालक्ष्मीको फ्ल्याट अगाडिको ढोका बन्द थियो । ढोका फोडेर पस्दा १६५ लिटरको फ्रीजबाट दुर्गन्धसँगै किरा पनि निस्किएको भेटियो । जब उनीहरूले फ्रीज खोले, त्यहाँको दृश्य देखेपछि दुवैजना ढले ।
फ्रीजको दुर्गन्धले बस्न नसेकपछि घरधनीसहित बाहिर निस्किएका थिए । उनीहरूले तत्कालै प्रहरीलाई झिकाए । त्यसपछि प्रहरीले महिलाका शवका टुक्रा उठाएर पोस्टमार्टमका लागि अस्पताल पठायो ।
प्रहरीका अनुसार बेंगलुरुकै एकवटा सपिङ मलमा काम गर्दै आएकी थिइन् । त्यहाँस्थित व्यालिकभलको पाइपलाइन रोडस्थित भवनको पहिलो तलमा उनको कोठा थियो ।
पाँच महिनादेखि बस्दै आएकी महालक्ष्मीसँग दाजु पनि बस्थे ।
प्रहरीका अनुसार उनको हत्या सेप्टेम्बर १२ मा भएको हो । पश्चिमाञ्चल डिभिजनका एसपी सतीश कुमारले सेप्टेम्बर १२ मा उनको हत्या भएको बताएका छन् ।
महालक्ष्मीको मोबाइल सेप्टेम्बर १२ देखि बन्द थियो । महालक्ष्मीको परिचितबाटै हत्या भएको आशंका प्रहरीले गरेको छ । घरका कुनै सामन नहराएकाले चोरीको उद्धेश्यबाट भन्दा परिचितबाटै उनको हत्या भएको एसपी सतीशकुमारले बताएका छन् ।
प्रत्यक्षदर्शी र छिमेकीले महालक्ष्मीलाई हरेक बिहान एकजना मानिसले लगेर बेलुका ल्याइदिने गरेको बताएका छन् । एकजना डेलिभरी ब्वाईले उनलाई प्रेम प्रस्ताव गरेको बताइए पनि पुष्टि भएको छैन । अर्को युवकसँग प्रेममा रहेकाले परिवारले पनि महालक्ष्मीलाई त्यागेको बताइएको छ ।
