नवराज पौडेल, कपिलवस्तु ।
कपिलवस्तुको शिवराज नगरपालिका वडा नं ६ मा वितरण गरिएको राहतमा विभेद भएको स्थानीयले गुनासो गरेका छन् । राहत वितरणमा विभेद भयो भन्दा उल्टै जनप्रतिनिधिले धम्क्याएको वडाबासीको आरोप छ ।

नगरपालिकाले दोस्रो चरणको राहत वितरण कार्यक्रम सम्पन्न गरेको छ । नगरपालिकाको वडा ६ मा राहत वितरण प्रक्रिया फितलो र विभेदकारी ढंगले भएको गुनासो आएको हो । नगरपालिकामा पहुँच भएका व्यक्तिले मात्रै राहत पाएको स्थानीयको भनाई छ ।

यता गुनासो गर्ने स्थानीयमाथि वडा सदस्य बुधई कुर्मीले धम्क्याएको उनीहरुले गुनसो गरेका छन् । वडाबासीको गुनासो लिन पत्रकारको टोली पुगेर फर्किएलगत्तै वडासदस्य कुर्मीले धम्की दिँदै कुटपिट गर्ने चेतावनी दिएका स्थानीइले बताए।
वडा सदस्य कुर्मीले भने गरीब, विपन्न र दैनिक रुपमा ज्याला मजदुरी गरेर खाने सम्पुर्ण वडाबासीलाई राहत वितरण गरेको दाबी गर्नुभएको छ ।

वडामा पहिलो चरणमा १२५ र द्रोस्रो चरणमा २६१ जना गरि ३८६ जनालाई राहत वितरण गरिएको र वडामा बाँकी राहत सामाग्री नभएको बताउँदै राहत पाउनबाट बन्चित भएका वडा बासीहरुलाई अवको केही दिनमा अन्य संघ सस्थाहरुसँग पहल गरी राहत वितरण गरिने वडा सचिव राम प्रसाद चौधरीले जानकारी दिनुभयो ।

वडामा २३ जना अझै राहत पाउन बाट बन्चित भएका छन् । शिवराज नगरपालिकामा पहिलो चरणमा १६६१ र द्रोस्रो चरणमा ३३६३ जना गरि ५०२४ जनालाई राहत वितरण गरिएको शिवराज नगरपालीकाका प्रशासकिय अधिकृत शेषकान्त पौडेलले जानकारी दिनु भएको छ । नगरमा दोस्रो चरणको राहत सामाग्री सकिएको र छुटकाको पुन विवरण संकलन गरि नगरपालिको निर्णय अनुसार वितरण गरिने बताउनु भयो ।