काठमाडौं । सडक डिभिजन कार्यालय काठमाडौंले काठमाडौँ महानगरपालिकाका मेयर बालेन शाहप्रति आपत्ति प्रकट गरेको छ ।

आफ्नो प्रवेशद्वारमा महानगरपालिककाले फोहोर फालिदिएको घटनालाई लिएर सडक डिभिजनले आपत्ति प्रकट गरेको छ ।

डिभिजन कार्यालयले शनिबार एक विज्ञप्ति जारी गरी महानगरले कानुनी राज्यको उपहास गरेको आरोप लगाएको छ। उक्त घटनाले महानगरपालिकाको गरिमा नबढाउने सडकको ठहर छ ।

‘काठमाडौँ जिल्लाभित्रका सडक निर्माण तथा मर्मत सम्भारको महत्त्वपूर्ण जिम्मेवारी पाएको यस सडक डिभिजनको गेटमा देशकै ठूलो तथा जिम्मेवार स्थानीय सरकारबाट कानुनी राज्यको उपहास हुने गरी बलमिच्याइँ तथा अराजक शैलीबाट भएको यस किसिमको व्यवहारले महानगरको गरिमा कदापि नबढ्ने विषय छर्लंग छ।’

शनिबार काठमाडौँ महानगरपालिकाले सडक डिभिजन कार्यालयको गेटमा एक ट्रक धुलो खन्याइदिएको थियो।

उक्त दृश्य सामाजिक सञ्जालमा सार्वजनिक गरी महानगर प्रमुख बालेन्द्र शाहले भौतिक पूर्वाधार तथा यातायात मन्त्री रघुवीर महासेठले कलंकीदेखि महाराजगन्जसम्मको चक्रपथ विस्तारका काम अघि नबढाएको आरोप लगाउँदै आक्रोश व्यक्त गरेका थिए ।

सडक डिभिजनले बालेनको कदमको प्रतिकार गर्ने चेतावनीसमेत दिएको छ ।

विज्ञप्तिमा भनिएको छ, ‘सडक डिभिजनको कार्य क्षेत्रभित्र भएका त्रुटि औंल्याई आवश्यक सुझाव दिए डिभिजन सकारात्मक सुझाव सम्झेर कार्यान्वयन गर्ने तर डिभिजनको कार्यक्षेत्रसँग सरोकार नभएको विषय उठाई भएका यस किसिमका अराजक व्यवहार आगामी दिनमा किमार्थ सह्य नहुने र सोको प्रतिकार गर्नसमेत बाध्य हुने व्यहोरा यसै विज्ञप्तिमार्फत जानकारी गराइन्छ ।’

काठमाडौं महानगरपालिकाले भने चक्रपथ विस्तारका क्रममा नागरिकले धूलो र कष्ट व्यहोर्नुपरेको आरोप लगाएको छ। महानगर प्रमुख शाहले भौतिक पूर्वाधारमन्त्री महासेठको निर्देशनमा चक्रपथ विस्तारको काम रोकिएको भन्दै काम सुचारु नगरेसम्म दैनिक एक ट्रक धुलो उपहार पठाइदिने घोषणा गरेका हुन् ।

कलंकीदेखि महाराजगन्जसम्म चक्रपथ विस्तारको नाममा १५ वर्षदेखि जनताले सास्ती बेहोर्नुपरेको शाहले लेखेका छन्।