काठमाडौं । सेक्युरिटी प्रिन्टिङ प्रेस खरिदमा दोषी ठहर भएका सिनियर डिभिजनल इन्जिनियर नवीनकुमार पोखरेल मृत अवस्थामा फेला परेका छन्।

उनी बिहीबार भक्तपुरस्थित आफ्नै घरमा झुण्डिएको अवस्थामा मृत फेला परेका प्रहरीले जनाएको छ । प्रहरीले घटनास्थलबाट सुसाइड नोट समेत फेला पारेको छ।

प्रारम्भिक अनुसन्धानका क्रममा उनले आत्महत्या गरेको बुझिन आएको भक्तपुर प्रहरीका एसपी अजय केसीले बताए ।

पोखरेलसहित अन्य ४ जना सुरक्षण प्रिन्टिङ प्रेस खरिदमा दोषी ठहर भएका थिए।

विशेष अदालतले उनलाई ६ महिना कैदको सजाय सुनाएको थियो भने ५ करोड ८४ लाख ५५ हजार १ सय ५९ रुपैयाँ जरिवाना असुलको फैसला सुनाएको थियो।

उनी गत वर्ष निलम्बनमा परेका थिए। प्रहरी घटनाबारे थप अनुसन्धान भइरहेको बताएको छ ।